авто

Переключатель языков

Құрметті музей қонақтары! Қазақстан Республикасының Мемлекеттік Орталық музейі 2019 жылдың 22 шілдесінде басталатын ағымдағы жөндеу жұмыстарының жүргізілуіне байланысты 3-ші экспозициялық залдың («Диаспоралар мәдениеті» және «Ұлы Отан соғысы жылдарындағы Қазақстан») уақытша жабылуы жайлы хабардар етеді.

Құрметті музей қонақтары! Мерекелік күндердегі музейдің жұмыс істеу тәртібі: 6, 7 шілде -қалыпты кесте, 8, 9 шілде – демалыс.

Калькулятор расчета пеноблоков смотрите на этом ресурсе
Все о каркасном доме можно найти здесь http://stroidom-shop.ru
Как снять комнату в коммунальной квартире смотрите тут comintour.net

Чехиядағы «Ұлы Даланың тарихи-мәдени келбеті» атты көрме

Чехия Ұлттық музейінде (Прага қ.) «Ұлы Даланың тарихи-мәдени келбеті» атты көрме ашылады. Көрмеге Қазақстан Республикасы Мемлекеттік Орталық музейі коллекциясынан алынған қазақтың тарихи этнографиясын және ежелгі көшпелілердің (сақтар мен ғұндар) археологиялық мәдениетін бейнелейтін 400-ден аса артефакт қойылады.

Чехиядағы «Ұлы Даланың тарихи-мәдени келбеті» атты көрме

05.08.2019 ж. Отырар қорғанысының 800 жылдығына арналған «ҚАМАЛЫ БЕКЕМ, ХАЛҚЫ ҚАЙСАР-ОТЫРАР» көрмесі

2019 жылы 5 тамыз күні сағат 15.00-де «Рухани жаңғыру» бағдарламасы және ұлт көшбасшысы Н.Ә.Назарбаевтың «Ұлы даланың жеті қыры» мақаласы аясында Отырар қорғанысының 800 жылдығына орай «ҚАМАЛЫ БЕКЕМ, ХАЛҚЫ ҚАЙСАР-ОТЫРАР» (Отырар қорғанысына 800 жыл) тақырыбында «Отырар мемлекеттік археологиялық қорық-музейі» РМҚК қор материалдары негізінде ұйымдастырылған көрме ашылады.

«ҚАМАЛЫ БЕКЕМ, ХАЛҚЫ ҚАЙСАР-ОТЫРАР» (Отырар қорғанысына 800 жыл)Отырар-әлемдік өркениетте өзіндік үлесі бар, тарихы терең, табиғаты көркем, төсінде сұлу Сыр мен ерке Арыс қатар аққан, Ұлы Жібек жолы бойындағы құтты мекен. Ежелгі заманнан-ақ бүкіл шығысқа кеңінен танымал Үнді, Қытай, Византия, т.б. мемлекеттермен үнемі ғылыми, мәдени, экономикалық, дипломатиялық байланыстарда болып, қалаларында ғылым мен мәдениет, сауда, өндіріс, далаларында егін, мал шаруашылығы қатар дамыған аймақ.

Ғұлама ойшыл Әбу Насыр Әл-Фарабидің туылған өлкесі Отырар – Қазақстанның оңтүстігінде орналасқан ортағасырлық қалалардың ең белгілісі. ҮІ-ҮІІІ ғасырларда Отырар-Фараб Сырдарияның орта шеніндегі ірі феодал иелігінің астанасы, ІХ-ХІІ ғасырларда аймақтың бас қаласы, ХІІІ-ХҮ ғасырларда Қазақстанның оңтүстігіндегі аса ірі қалалардың бірі, ал ХҮІ-ХҮІІІ ғасырларда Қазақ хандығының саяси және экономикалық орталығы болған.

ХІХ ғасырдың аяғында Отырар қирандылары мен оның төңірегінде орналасқан басқа да ескерткіштер зерттеуші ғалымдардың назарынан тыс қалған жоқ. Отырар ескерткіштері жайлы В.В.Бартольд, Е.Г.Смирнов, Н.С.Лыкошин, А.О.Руднев, Д.Н.Люшин, И.А.Кастанье, А.К.Кларе, А.Черкасов, И.Т.Постлавский, А.Н.Бернштам, Е.И.Агеева, А.Г.Максимова К.А.Ақышев, К.М.Байпақов, М.Б.Қожа және тағы басқа ғалымдардың еңбектерінде кеңінен жазылған. Тарихи деректерге сүйенсек, Отырардың алғашқы топографиялық сұлбасы 1903 жылы түсірілді. Отырарды зерттеу 1904 жылдары А.Кларенің басшылығымен жүргізілген алғашқы ғылыми негіздегі қазба жұмыстарынан басталады.

1947 жылы Оңтүстік Қазақстанда орналасқан ескерткіштерді зерттеу қолға алынып, сол кездегі Тарих, археология және этнография институты мен материалдық мәдениет институтының Ленинградтық бөлімі бірлесе отырып Оңтүстік Қазақстан археологиялық экспедициясын (ОҚАЭ) құрды, экспедиция басшысы А.Н.Бернштам болды. ОҚАЭ өңірдегі Пышақашытөбе, Алтынтөбе, Құйрықтөбе, Марданкүйік, Көкмардан сонымен қатар Сырдарияның солтүстік жағасындағы Бұзық, Оқсыз, Артық ата, Қауған ата, және Сумағар сияқты тарихи ескерткіштерге зерттеу жұмыстарын жүргізді. 1969-1971 жылдары Кемел Ақышевтің бастамасымен ҚазКСР Ғылым Академиясының Ш.Уалиханов атындағы тарих, археология және этнография институты Отырар экспедициясымен жұмысты қайта бастады. Нәтижесінде Отырар Қазақстан мен Орта Азия аумағындағы барынша терең зерттелген ортағасырлық қала болып саналады.

Тарихтың, халықтың өсу жолымен ұштасып, жалғасып жатқан Отырардағы археологиялық қазба, зерттеулер нәтижесінде табылған, тарихи мұраларымыз осындағы ғылыми-зерттеу, мәдени-ағарту және археологиялық ескерткіштерді қорғау мекемесі «Отырар мемлекеттік археологиялық қорық-музейі» РМҚК қорында жинақталған.

Төрт бөлімнен тұратын көрменің алғашқы бөлімін музей қорындағы археологиялық материалдардың ерте ортағасырлық үлгілері ІІІ-VIII ғғ. тән түпнұсқа жәдігерлер мен деректік материалдар құрайды. ІІ-бөлімде Орта Азия мен Қазақстанның оңтүстігіндегі қала мәдениетінің дәуірлеген кезіндегі Отырар, яғни ІХ-ХІІ ғғ. Отырардың тыныс-тіршілігін баяндайтын еңбектер қорытындылары мен сол кезеңдерден жеткен археологиялық материалдар. ІІІ-бөлімде ХІІІ ғасырдағы Отырардағы дүрбелең, моңғол шапқыншылығы кезіндегі Отырардың тіршілігі және осы кезеңдерге тән жәдігерлер, ІV-бөлімде Отырардың қайта бой көтеруі. Билеуші Әмір Темір дәуірінен бастап Қазақ хандығы тұсындағы Отырардың даму кезеңдерінен хабар беретін бірегей, түпнұсқа заттар мен деректер қамтылады.

Мажарстан Ұлттық музейімен Меморандумға қол қойылды

Мажарстан Ұлттық музейімен Меморандумға қол қойылдыҚР МОМ халықарылық ынтымақтастық шеңберінде, Қазақстан Республикасы мен Мажар Республикасы арасындағы мәдени байланыстарды нығайту мақсатында, Қазақстан Республикасы Мемлекеттік орталық музей директорының орынбасары Б.Дандығараева және Мажарстан Ұлттық музей директоры Бенедек Варга музей ісі, тәжірибе алмасу, ғылыми және мәдени-біліми жобаларды жүзеге асыру мақсатында ынтымақтастық Меморандумына қол қойды.

Бекітілген Меморандум нәтижесінде 2020 жылы Мажарстан Ұлттық музейінде (Будапешт қ.) Қазақстан Республикасы Мемлекеттік орталық музей қор коллекциясының «Ұлы даланың тарихи-мәдени келбеті» атты көрме өтеді. Көрме Мажарстандықтарды қазақтардың тарихы және мәдениетінің бай этнографиялық коллекциясымен, сондай-ақ ерте көшпелілердің дәстүрімен таныстырады.

Көрме Қазақстан Республикасы Мәдениет және спорт министрлігі және Мажарстандағы Қазақстан Елшілігінің қолдау көрсетті.    

12.06.2019 ж. Академик Ә.Марғұланның 115 жылдық мерейтойына орай «Дара тұлға» атты көрмесі

Қазақстан Республикасы Мемлекеттік Орталық музейі 2019 жылдың 12 маусымында сағат 15.00-де академик Ә.Марғұланның 115 жылдық мерейтойына орай «Дара тұлға» атты көрме ашады.

Көрменің мақсаты: академик Ә.Х. Марғұланның өмір жолымен және одандық филология, археология, этнография,сәулет өнері сынды ғылымдарға қосқан үлесімен таныстыру .

«Дара тұлға» атты көрмеҚазақстан археологиясының қалыптасуы өмірі мен шығармашылығы Қазақстан ғылымының, оның ішінде, тікелей алғанда, ұлттық археология – этнография мектептері тарихының қалыптасу-даму үдерісінің айнасы іспетті – Ә. Х. Марғұланның атымен байланысты деуге болады.

Академик Әлкей Марғұланның (1904-1985) зерттеулері археология, этнография, филология, қазақ халқының мәдениеті, өнер тарихы сияқты түрлі салаларды қамтыды. Ол өткен ғасырдың 40 жылдарынан бастап Қазақстан аумағындағы археологиялық ескерткіштерді іздестіріп, зерттеу шараларын қолға алды. Жетісу, Оңтүстік, Батыс Қазақстан жеріндегі ежелгі қала мәдениетінің орындарын анықтап Отырар, Тараз, Сауран, Сығанақ, Сарайшық сияқты гүлденген отырықшы тұрмыс орталықтарының болғанын дәлелдеді.

Қола дәуіріндегі ежелгі көшпелілердің материалдық мәдениетінің ескерткіштерін іздестіру, зерттеу жұмыстарына Ә.Х. Марғұлан 30 жыл бойы жетекшілік етті. Қола дәуірінде Орталық Қазақстан ірі өркениет ошағы болып мұнда бірегей беғазы-дәндібай мәдениеті қалыптасқанын ғылыми негізде дәлелдеді.

Көшпелілердің және олардың мұрагерлері – қазақтардың материалдық мәдениетінің тарихы ғалымның «Казахское народное прикладное искусство» деген еңбегінде толық сипатталады. Ә.Х. Марғұланның «Древние караванные пути через пустыню Бетпак дала», «О происхождении племени канглы», «О значении эпиграфических памятников Казахстана», «Шоқан және Манас», «О наследии Машхур-Жусуп Копеева», «Ежелгі жыр аңыздар» т.б. еңбектері біздің ата-бабаларымыздың терең де бай рухани әлемінің куәсі деуге болады. Ол 50 жылдардың орта кезінен бастап қазақ халқының ғұлама ғалымы Ш.Ш. Уәлиханов жайлы материалдарды жинастырып, 1961-1972 жылдар аралығында ұлы қазақ ғалымының шығармалар жинағының бес томын шығарды.

Көрмеде фотосуреттер, академик Ә.Х. Марғұланның жеке заттары, құжаттар, марапат белгілері және ғалымның ғылыми-зертеу, ұйымдастырушылық қызметін, әрі Қазақстан археологиясының дамуына қосқан үлестерін айғақтайтын музей қорынан алынған материалдар ұсынылады. Сондай ақ, Орталық Қазақстан археологиялық экспедициясының ізденістері барысында жиналған неолит және қола заманының артефактілері көрсетіледі. Орталық Қазақстан экспедициясының соңғы жылдардағы зерттеулерімен Атасу, Ақмая, Мыржық қоныстарынан табылған заттар арқылы танысуға болады. Ерте темір ғасырының ескерткіштерінен тасмола мәдениетінің артефактілері бар. Ғалым орта ғасырлар тарихын зерттеудегі табыстарын Нұра өзені маңындағы қорымдардан, Отырар төбе қалаларындағы қазбалардан жиналған дүниелер, орта ғасырлардағы құрылыс-сәулет өнерінің ескерткіштері – түрлі ғимараттар макеттері аңғартады. Көрмедегі этнографиялық материалдар терең тамырлы мәдени мұраның айғағы. Көрме экспозициясын түрлі материалдар: қазба жұмыстарының панорамасы, жартас бетіндегі суреттер, археологиялық ескерткіштердің фотосуреттері, сондай-ақ Әлкей Марғұлан жайлы басқа ғалымдардың ой-толғаулары толықтырады.

Көрме 2019 ж. 10 шілдеге дейін жалғасады.

01.06.2019 ж. Марис Хитахуновтың 80 жылдығына арналған "Ана жер құшағында" атты көрме-фестиваль.

 

Қазақстан Республикасының Мемлекеттік орталық музейі Қазақстан Республикасы Президентінің «Болашаққа бағдар: Рухани жаңғыру», «Ұлы даланың жеті қыры» бағдарламалары және жарияланған Жастар жылы, сондай-ақ Халықаралық балаларды қорғау күні аясында «Аламәт» продюсерлік орталығы және «Шәбнәм» ұйғыр креативті қыздар клубымен бірлесіп 2019 жылдың 1 маусым күні белгілі ұйғыр суретшісі, Еңбек сіңірген өнер қайраткері, КСРО Суретшілер Одағының мүшесі, Қазақстан Суретшілер одағының басқарма мүшесі, Қазақстан Жазушылар Одағының мүшесі, педагог Марис Хитахуновтың 80 жылдығына арналған Республикалық фестиваль, «Ана жер құшағында» атты көркем шығармалардың мемориалдық көрмесін ашады.

10.00-11.00 «Менің балалық шағымның әлемі» сайысы – 6-9 жастағы балалардың қатысуымен асфальтта сурет салу.

11.00-14.00 Марис Хитахуновтың өмірі, шығармашылық жолымен, суретшінің қызы Мухаббат Хитахунованың шығармаларымен, сондай-ақ ұйғыр суретшілері жаңа буын өкілдерінің жұмыстарымен таныстыратын «Ана жер құшағында» көрмесінің салтанатты ашылуы.

pic-uigur-1-juneҚР Орталық музейі келушілер назарына алғаш рет М. Хитахуновтың (1939-1994 жж.) шығармашылығын ұсынады. Марис бала кезінен сурет салумен айналысқан. 14-15 жасар суретшінің «Жүгері жинау науқанында ата-аналарымызға біздің көмегіміз!» ұранымен орындаған плакатының эскизі аудан бойынша І орынды иеленді, осы кезде Республикалық басылым «Дружные ребята» газеті суреттер байқауын жариялайды, байқауға қатысқан жас дарын ІІ орынды («Колхозға көмек») иеленеді. Бұдан кейін ол Крупская атындағы Бүкілодақтық Халықаралық универсистетте сырттай білім алды. Өзінің еңбек жолын М. Хитахунов Ахтам ауылындағы мектепте сурет және дене шынықтыру пәнінің мұғалімі болып бастады, артынша Гоголь атындағы Алматы сурет училищесін және А. Островский атындағы Ташкент Театр-сурет институтын тәмамдайды.  Ұзақ жылдар бойы Н. Гоголь атындағы Алматы көркемсурет училищесі, Алматы Сәулет-құрылыс институты, О. Таңсықбаев атындағы Алматы сурет училищелерінде қызмет атқарды. Хитахунов Қазақстан Суретшілер одағы Басқармасының, Қазақстан Мәдениет министрлігінің бейнелеу өнері жөніндегі сараптамалық комиссиясының, Қазақстан білім министрлігінің «Республикалық эстетикалық тәрбие бағдарламасын» орындау жөніндегі ғылыми-зерттеу комитетінің мүшесі, Қытай – Қазақстан достық қоғамының мүшесі болды.

Шебер шығармашылығында кескіндемемен қатар әдеби қызмет те маңызды орын алады. Марис – «Арман әлемі», «Умут учкунлири», «Прощай, лето», «Бейнелеу өнерінің негіздері» қолжазбасы, мерзімді баспасөзде және «Ұйғыр тілі және оқу» оқулық құралында жарияланған әңгіме, түрлі бағдарламалар мен диафильмдердің авторы; бейнелеу өнері бойынша дайындалған бағдарламаның орыс тіліндегі нұсқасының ұйғыр тіліндегі шығарылымының аудармашысы, ол ұйғыр жазушылары мен балалар кітаптарының иллюстраторы ретінде де танымал.

М. Хитахунов – республикалық, бүкілодақтық, халықаралық көрмелердің (Биеннале «Азия-Арт», Ташкент қ. Мұнда бір топ суретшілер І дәрежелі диплом және алтын медальді иеленген) қатысушысы. Ұйғыр суретшілерінің бірінші Республикалық «Мың ой» көрмесінде ол КСРО Көркемөнер академиясының, КСРО Суретшілер Одағының медальдарын, лауреат атағын иеленсе, Қазақстан Суретшілер Одағының 50 жылдығы құрметіне және республика өнерін дамытуға қосқан үлесі үшін Құрмет грамотасымен марапатталған. Суретшінің бірқатар шығармалары Қазақстан, Ресей, Түркия және т. б. елдердің музейлерінде, жеке коллекцияларда сақталуда.

Көрме экспозициясында келушілер назарына суретші-кескіндемеші, педагог, ҚР Суретшілер Одағының мүшесі, Президенттік стипендияның екі мәрте лауреаты, Н. Гоголь атындағы Алматы көркемсурет училищесінің, Абай атындағы ҚазҰПУ түлегі - Мухаббат Хитахунованың жұмыстары да ұсынылды. Мухаббат бүгінге дейін 200-ден астам халықаралық және республикалық көрмелерге қатысты.

Фестиваль аясында концерт және көрмеге қатысушыларды марапаттау шарасы ұйымдастырылады. Іс-шараға ұйғыр тілінде білім беретін мектеп-гимназия оқушылары да тартылды.

Көрермендер назарына 80 астам жұмыстар ұсынылады.

Көрме 2019 жылдың 14 маусымына дейін жалғасады. 

 

Сайт материалдарын пайдаланған жағдайда, музейге сілтеме көрсетілуі керек. // При использовании информации с сайта, просим указывать источник.
When using information from this site, please link to the source