🌿2026 жылғы 18 наурыз күні сағат 16:00-де Қазақстан Республикасы Ұлттық орталық музейінде қазақ мәдениетіндегі ең жарқын әрі мағыналы мерекелердің бірі — көктемгі жаңару, татулық пен дәстүр сабақтастығының символы саналатын Наурыз мейрамына арналған «Наурыз. Ұрпақтар диалогы» атты көркемөнер көрмесінің ашылуы өтеді.
Экспозицияда ұстаздар мен олардың шәкірттерінің туындылары тоғысып, ұрпақтар арасындағы шынайы көркем диалогты қалыптастырады. Бұл диалогта тәлімгерлердің тәжірибесі мен парасаты жас авторлардың шынайы, сезімге толы әрі жарқын көзқарасымен үйлесім табады.
Балалар суреттері мен кескіндемелік композициялар арқылы Наурызды отбасы бірлігі, достық, ізгі дәстүрлер және табиғаттың жаңғыру мерекесі ретінде қалай түсінетіндерін бейнелейді. Туындыларда туған үйдің жылуы, балалық шақтың жарқын сәттері, ұлттық салт-дәстүрлер, көктемгі ойындар мен бірге тойлаудың шаттығы көрініс табады. Балалар өнері көрмеге ерекше жылылық, шынайылық және нұрлы көңіл-күй сыйлайды.
Бұл көрме көркемдік білімнің мәдени мұраны сақтаудағы, ұлттық құндылықтарға құрмет қалыптастырудағы және рухани дәстүрлерді үлкен буыннан жас ұрпаққа жеткізудегі маңызды рөлін айқындайды. Мұнда педагог — бағыт-бағдар беретін ұстаз әрі рухани жол көрсетуші ретінде көрінсе, ал бала — мәдени жадты жалғастырушы, болашақты қалыптастыратын жасампаз тұлға ретінде танылады.
«Наурыз. Ұрпақтар диалогы» экспозициясында 40-тан астам туынды ұсынылған. Бұл шығармалар көрерменді көктем мерекесінің шуақты атмосферасына жетелеп, әлемді балалардың көзімен көруге және өнердің өткенді, бүгінді және болашақты біріктіретінін сезінуге мүмкіндік береді. 🌿
Көрме 2026 ж. 1 сәуіріне дейін жалғасады.
Мекен-жайы: Самал-1,44. ҚР Ұлттық орталық музейі
