2025 жылдың 28 қарашасы күні сағат 16:00-де Қазақстан Республикасы Ұлттық Орталық музейінде ҚР мәдениет үздігі, суретші, мүсінші, карикатурашы Қали Қораласбаевтың «КИЕЛІ МЕКЕН» есептік жеке шығармашылық көрмесінің ашылу салтанаты өтеді. Аталмыш көрме 25 қазан – Республика күніне, Шу ауданының 95 жылдығына және өнер иесінің 60 жасқа толған мерейтойына орай ұйымдастырылып отыр.
Өмірін өнер мен шәкірт тәрбиесіне арнаған Қали Қораласбаев – ел мәдениетіне елеулі үлес қосып келе жатқан тұлға. Ол көп жылдар бойы Жамбыл облысы Шу ауданындағы «Балалар мен жасөспірімдер орталығында» қызмет атқарып, болашақ суретшілердің дарынын ашып, олардың шығармашылық ізденісіне бағыт-бағдар беріп келеді. Оның шәкірттері бүгінгі таңда түрлі республикалық, халықаралық байқауларда жеңімпаз атанып, ұстаз еңбегінің жемісін паш етуде. Ұстаз үшін ең үлкен марапат – өз ісін жалғастыратын ұрпақ тәрбиелеу болса, Қали Қораласбаев осы парызын абыроймен атқарып жүрген азамат.
Суретші 1965 жылдың 20 маусымында Шу ауданында дүниеге келген. Алматы қ. Гоголь атындағы көркемсурет училищесін аяқтағаннан кейін, ол бейнелеу өнері саласындағы кәсіби шығармашылық жолын бастайды. Оның шығармалары ұлттық нақышы мен терең мазмұны, туған жерге деген сүйіспеншілігі арқылы ерекшеленеді. Бейнелеу өнері, мүсін және карикатура саласында өзіндік қолтаңбасын қалыптастырған шебер халықаралық және республикалық деңгейдегі көптеген байқаулардың жеңімпазы атанған.
«Киелі мекен» көрмесінің негізгі мақсаты – Қазақстанның бейнелеу өнерін дамыту, ұлттық мәдениет пен рухани құндылықтарды жаңғырту, сондай-ақ көрерменге туған жер тарихының көркем бейнесін паш ету. Суретші өз шығармалары арқылы адамның туған жерге деген сүйіспеншілігін, рухани тамырын және ұлттық бірегейлікті көркемдік тілмен жеткізуді мақсат етеді.
Көрмеде суретшінің түрлі техникада орындалған 100-ден астам туындысы ұсынылады. Олардың қатарында табиғи тас пен ағаштан ойылған мүсіндер, кескіндеме және графикалық жұмыстар бар. Әр туындыда автор туған елдің тарихы мен табиғатын, халқымыздың салт-дәстүрі мен қазақ халқының рухани болмысын өнер тілімен шебер өрнектейді.
Қали Қораласбаевтың еңбектері еліміздің жетекші мәдени ошақтарының қорында сақтаулы. Табиғи тастан жасалған «Абыз» атты туындысы Қазақстан Республикасының Ұлттық музейінде, ал «Ана – Жер Ана» мүсіні Ә.Қастеев атындағы Ұлттық өнер музейінде, «Желтоқсан желі – 86» еңбегі Жамбыл облыстық музей қорын толықтырған. Бұл туындылар суретшінің ел руханиятына қосқан зор үлесінің айғағы іспетті.
Суретші бұған дейін де республика бойынша бірнеше жеке көрмелерін өткізген. Әулиеата жерінде ұйымдастырылған «Тәуелсіздік – ел тұғыры», «Ақ мекен», «Жемқорлық – жегіқұрт» атты шығармашылық көрмелері көрерменнің жоғары бағасына ие болып, қоғамдағы өзекті мәселелерді өнер тілімен жеткізудің үлгісі болды.
Қали Қораласбаев — өз еңбегін туған жеріне арнап, оны өнер арқылы халықаралық деңгейде танытқан тұлға. Ол үшін «Ауылдың өнер азаматы» атану – ең биік мәртебе. Себебі ауыл – рухтың, тазалықтың және шынайылықтың бастауы. Суретшінің шығармалары осы қасиеттерді бейнелеу арқылы көрерменге адамгершілік, ұлттық намыс пен рухани тұтастық идеяларын жеткізеді.
“Киелі мекен” көрмесі – тек суретшінің шығармашылық жетістіктерінің мерекесі ғана емес, сонымен қатар туған жердің тарихы мен киесін дәріптейтін, өнер мен рухани құндылықты ұштастыратын үлкен мәдени шара болмақ.
Көрме 2025 ж. 11 желтоқсанына дейін жалғасады.
