2025 жылдың 15 қаңтары сағат 16:00 Қазақстан Республикасы Мемлекеттік орталық музейінде суретші Лея Санатаның «Гүлдер құшағында» жеке көрмесінің салтанатты ашылуы өтеді.
1973 жылы дүниеге келген Лея Саната– бейнелердің құпиясын тереңнен ұғынып, бізді кенеп пен бояу арқылы өзге бір әлеммен таныстырады. Оның әрбір жұмысынан шексіз махаббат сезіледі. Әрбір картинасы өмір қуанышы мен тәтті сезімдерді оятып, адамның жанын тербетеді. Ол табиғаттың терең де нәзік түстерін пайдалана отырып, адам мен табиғаттың бітеқайнасқан бірлігін көрсетеді.
Лея Саната бірқатар елдің әлемдік қоғамдастығында «өнер әлемінің сұр кардиналы» болып танылды. Ол – түстердің нәзік сезімін тереңнен ұғынған әлем адамы. Суретшінің халықаралық марапаттары мен сертификаттары бар, Artist Talk (London),Artist Talk Magazine (UK) Goddessarts magazine (Germany), Cumhuriyet (Turkey) секілді бірқатар халықаралық журналдарда еңбектері жарық көрген.
Өнертанушылар Лея Санатаның стилін Grand Genre, яғни «жоғары жанр» десе, сарапшылар оның кескіндемесін жаңа сюрреализмге жатқызады.
Италия, Түркия, Дубай елдерінде үлкен жетістікке жеткен көрме Қазақстанда тұңғыш рет ашылмақ. Аталмыш көрме әр елге саяхат десе де болады.
Суретшінің шығармашылығы ғасырлар бойы адам санасына сіңіп қалған кейбір түсініктерді түбірімен өзгертті. Өнертанушы Дильшат Харман айтқандай: «Ер адам ғана данышпан, әйел адам тек қана ер адамның шабытын оятатын муза деген түсініктің қанымызға сіңгені соншалық, дарынды әйел суретшінің еңбегін бағалау да қиынға соғады».
Лея Санатаның кескіндемесі Әйел адамның бейнесін әр жетістігінде шексіз кемелдене гүлдейтін сан қырлы нәзік гүлмен салыстыра отырып бейнелейді. Әйел – бір қолымен бесікті, екінші қолымен әлемді тербеткен ана, данышпандықтың, ішкі ұлы күштің көрінісі. Оның әрбір шығармасы әйел адамның ұлылығына арналған. Себебі, өзі де өмірінің әр сәтінде бүр ашқан гүлдей, бойына нәзік сезім мен ұлы дарынды сіңірген.
Лея Санатаның 40-тан астам бірегей шығармалары жинақталған жеке көрмесі әрбір өнерді бағалайтын жандар үшін жарқын оқиғалардың бірі болмақ. Бұл әрбір бояу махаббат, нәзіктік пен ұлылықтың үйлесімділігі, жылу мен жарыққа толы әйел жанының терең сырын ашатын хош иісті гүлдер әлемімен етене танысуға зор мүмкіндік. Суретшінің теңдессіз шығармашылығымен таныса отырып, сұлулықтан шабыт алатын айтулы күндердің бірі болмақ.
Қала тұрғындары мен қонақтарын ҚР Мемлекеттік орталық музейіне келіп, осы тамаша өнер саяхатына аттануға шақырамыз.
