2025 жылғы 23 сәуір күні сағат 11:00-де Қазақстан Республикасының Орталық мемлекеттік музейінде Қазақстан Республикасының Президенті Қасым-Жомарт Тоқаевтың 2025 жылды «Жұмысшы кәсіптер жылы» деп жариялауына орай «Кәсіптің күші – халықтың игілігі» атты көрменің салтанатты ашылуы өтті.
Көрменің мақсаты – ел дамуына жұмысшы мамандықтарының маңызын нақты еңбек адамдарының өмірі арқылы көрсету, еңбек ерлігінің тарихи жадысын сақтау және жұмысшы кәсіптердің өзектілігін айқындау.
Көрмеде өндірістің алдыңғы қатарлы еңбеккерлері мен Социалистік Еңбек Ерлерінің ерліктерін баяндайтын бірегей фотодеректі материалдар ұсынылды. Атап айтқанда: Қарағанды қаласындағы №3 шахтаның навалоотбойщиктер бригадасының бригадирі Шоманов Сәкен; М. Калинин атындағы Семей ет комбинатының еңбек ардагері Байсақақов Түйтебек; «Киров» шахтасының кешенді өндіру бригадасының бригадирі Абдрасұлов Қыдыр және елдің өнеркәсібі мен халық шаруашылығының дамуына зор үлес қосқан басқа да көрнекті еңбек адамдары.
Іс-шараға Алматы қаласының кәсіби колледждерінің студенттері қатысты. Олар: Алматы мемлекеттік электромеханикалық колледжі, Алматы автомеханикалық колледжі, Архитектура, дизайн және инжинерия колледжі, Политехникалық колледж, сондай-ақ «АЗТМ» АҚ (Алматы ауыр машина жасау зауыты) қызметкерлері.
Көрменің ашылу салтанатында құттықтау сөз сөйлегендер:
- «АЗТМ» АҚ техникалық директоры – Төрсеитов Мұратбек Қапашұлы.
- Архитектура, дизайн және инжиниринг колледжінің аға оқытушысы – Алибақова Айтгүл Құланқызы.
- Алматы мемлекеттік электромеханикалық колледжінің оқытушысы – Ілиясов Қуаныш.
«Кәсіптің күші – халықтың игілігі» көрмесі жұмысшы мамандықтарын насихаттауға арналған маңызды алаңға айналып, жас ұрпақты жасампаз еңбек жолын таңдауға шабыттандырады деп сенеміз.
