Қазақстан Республикасының Мемлекеттік орталық музейі 2025 жылдың 30 шілдесінен 6 тамызына дейін суретші Әйгерім Бектаеваның «Менің жолым» атты жеке көрмесін ұсынады.
Әйгерім Бектаева – төрт баланың анасы және өз шығармашылығындағы дәстүр мен жаңашылдықты біріктіретін заманауи әйел. Өз халқының мәдени мұрасынан шабыттанып, ол бүкіл адамзатқа ортақ құндылықтарды бейнелейтін әмбебап тұлға ретінде кескіндеме туындыларын жасайды.
1986 жылы 27 қаңтарда Шымкент қаласында дүниеге келген. Отбасында білімге деген сүйіспеншілік пен құрметке негізделген атмосфера орнап, суретшінің ішкі тірегі мен шығармашылық бастамасының қалыптасуына негіз болды. Өнерге деген қызығушылығы бала кезінен бастау алды: алдымен – өнер мектебі, кейінірек кескіндеме оның кәсібі мен өмірлік миссиясына айналды. Ресми білім алумен қатар, ол халықаралық деңгейдегі танымал ұстаздардан дәріс алып, Флоренция, Париж, Мәскеу және Барселонадағы Өнер академиясында білімін жетілдірді. Әйгерім Бектаева – белгілі шеберлер Андреа Баккалини мен А. Ақанаеваның шәкірті.
А. Бектаева – өнертану докторы, Қазақстан Республикасы Өнер академиясының мүшесі, «Zere School of Fine Arts» мектебінің негізін қалаушы, халықаралық байқаулардың лауреаты, Нью-Йорк, Париж және Майамидегі беделді жәрмеңкелер мен көрмелердің қатысушысы. Оның шығармашылығы Париж, Рим және Мадрид қалаларында Гран-при жүлдесімен, сондай-ақ мәдениет пен өнерге қосқан үлесі үшін берілетін жоғары марапаттармен бағаланды.
Суретшінің көркемдік практикасы екі негізгі бағытта дамып келеді: портреттік кескіндеме және концептуалды сериялар. Портреттік жұмыстарында, ол адамның сыртқы ұқсастығын ғана емес, ішкі әлемінің тереңдігін де жеткізуге ұмтылады. Оның портреттік топтамалары – түрлі мәдениеттердің көркем шежіресі іспеттес: әрқайсысы дәстүр мен қазіргі заман арасындағы көркем көпірге айналады. Сонымен қатар, суретші архетиптік бейнелер мен терең философиялық идеялардан шабыт алған «Аралар ханшайымы» атты символикалық серияны жасап келеді. Суретші Ә. Бектаева атап өткендей: Портретші ретінде мен даралықты терең құрметпен бейнелеуге бағытталған баяу әрі ойластырылған процеске адалмын. Өз шығармашылық тәжірибемде мен әртүрлі мәдениеттерге арналған портреттік серияларды жасаймын – бұл туған жерім мен ана тілім – қазақ мәдениетінен басталып, өзге халықтардың рухани мұраларымен жалғасады. Әрбір серия – адамды оның тамыры, дәстүрі мен символикасы арқылы тереңірек танудың бір жолы. Мен негізінен майлы бояумен жұмыс істеймін – бұл әр портреттің бірнеше ай бойы қабаттап жазу, нақтылау және мұқият жұмыс арқылы біртіндеп жетілуіне мүмкіндік береді. Мен үшін тек сыртқы ұқсастықты беру емес, адамның ішкі болмысын – қадір-қасиетін, тыныштығын, мағыналылығын жеткізу маңызды. Портрет – бұл уақыт, құрмет пен толыққанды шоғырлануды талап ететін қолөнер. Сонымен қатар, мен «Аралар ханшайымы» атты серияны дамытып келемін – медитация практикасы мен табиғаттағы формалардан шабыт алып, символикалық бейнелер арқылы күш, тұлғаның трансформациясы, сәйкестілік пен тиесілілік тақырыптарын зерттеймін.
Көрмеде А. Бектаеваның 30-ға жуық туындысы қойылған. Оның әрбір жұмысы – табандылықтың, өзін-өзі жүзеге асырудың және үнемі жаңа дүниелерді іздеудің символы. Стиль мен түстік палитраның алмасуы арқылы суретші екі негізгі бағытта жұмыс істейді: көп қырлы портреттер мен «Аралар ханшайымы» атты концептуалды туындыларды жасайды. Бұл шығармалар тәртіп пен жүйеліліксіз нәтиже болмайтынын еске салады.
Көрме 2025 жылғы 6 тамызға дейін жалғасады.
