2025 жылғы 16 – 30 қазан аралығында Қазақстан Республикасы Мемлекеттік орталық музейінде «Тұмар-Арт» оқытушы-суретшілер ассоциациясы және олардың талантты шәкірттерінің қатысуымен Алматы қаласының үздік көркемсурет студияларының жұмыстарынан тұратын көрме өтеді.
«Күзгі симфония: балалар мен тәлімгерлер» — түрлі буындар арасындағы шығармашылық диалог. Мұнда жас таланттардың шынайылығы мен тәжірибелі суретшілердің көркемдік тереңдігі ұштасады. Ассоциация құрамындағы ұстаздар халықаралық және республикалық көрмелерге тұрақты түрде қатысып қана қоймай, жаңа буынды тәрбиелеуге де зор үлес қосуда. Олардың шәкірттерінің басым бөлігі түрлі деңгейдегі өнер байқауларының жүлдегерлері атанған.
«Тұмар-Арт» ассоциациясы өз қызметінде өнер әлемінің байлығын көрсететін көптеген көрнекті жобаларды жүзеге асырды. Олардың қатарында: «Қалалық қызғалдақтар фестивалі», «Арт-Флора», «Бояулар құпиясы», «Ғалам палитрасы», «Сұлулық аумағы», «Қазақстан: кеше, бүгін, ертең», «Алматы – мың бояулы қала», «Шабыт уақыты», «ART MIX», «Атамекен» және басқа да шаралар бар. Бұл көрмелер мәдени өмірде айрықша орын алып, өнерге деген қызығушылықты арттырып, ұрпақтар арасындағы байланысты нығайтты.
«Күзгі симфония: балалар мен тәлімгерлер» көрмесі күз тақырыбындағы түрлі жұмыстарды ұсынады. Аталмыш көрмеде балалардың шығармашылық әлеуеті мен олардың тәлімгерлерінің кәсіби шеберлігі көрініс табады.
Көрменің мақсаты — әр түрлі буын өкілдері өз өнері арқылы күздің ерекше көңіл-күйін, бояуларын және бейнелерін жеткізуі. Күз — табиғаттың өзгерістерге дайындалатын ерекше кезеңі. Бұл көрме шығармашылық ынтымақтастық, идеялар алмасу және шабыт алу алаңы ретінде ұйымдастырылып, әр қатысушы — тәжірибелі шебер ме, жас өнертапқыш па — күз мезгіліне деген жеке көзқарасын білдіруге мүмкіндік алады.
Экспозицияда табиғаттың сұлулығын, күзгі өнімнің берекесін және күз мезгілінің поэтикалық бейнесін көрсететін, кескіндеме, графика, сулы бояу, пастель және коллаж сияқты түрлі техникада орындалған 100-ден астам жұмыс ұсынылады.
Қаланың тұрғындары мен қонақтарын 2025 жылғы 18 қазанда сағат 12:00-де ашылатын «Күзгі симфония: балалар мен тәлімгерлер» көрмесіне шақырамыз.
Көрме 30 қазан 2025 жылға дейін жалғасады.
