Қазақстан Республикасының Ұлттық орталық музейі мен Алматы қаласындағы Түркімен қоғамдық-мәдени орталығы ынтымақтастық туралы меморандумға қол қойды.
Қазақстан Республикасының Ұлттық орталық музейі мен Алматы қаласының Түркімен қоғамдық-мәдени орталығы қоғамдық бірлестігі арасында өзара ынтымақтастық туралы меморандумға қол қойылды. Бұл құжат екі ел арасындағы мәдени байланыстарды нығайтуға бағытталған маңызды қадам болды.
Меморандум аясында түркімен халқының бай мәдени мұрасын кеңінен насихаттауға арналған «Достығымыз жарасқан» мәдени-танымдық іс-шарасы ұйымдастырылды. Шараның басты мақсаты — түркімен халқының тарихын, дәстүрін, өнерін және ұлттық құндылықтарын кеңінен таныстыра отырып, Қазақстан мен Түрікменстан арасындағы достық пен мәдени ынтымақтастықты тереңдету.
Іс-шараны Қазақстан Республикасы Ұлттық орталық музейі директорының музейлік менеджмент және маркетинг жөніндегі орынбасары Арайлы Бақытқызы ашып, қос ел арасындағы мәдени қарым-қатынастардың маңыздылығына тоқталды. Сонымен қатар, Алматы қаласындағы Түркімен қоғамдық-мәдени орталығы қоғамдық бірлестігінің төрайымы Абдулкарим Огузхан мен Гүлнар Атайқызы жиналған қауымды мәдени шараның ашылуымен құттықтады.
Шара барысында қонақтар түркімен халқының ұлттық биі мен әндерін тамашалап, ұлттық қолөнер туындылары мен тұрмыстық бұйымдардан құралған көрмені тамашалады. Сонымен қатар, ұлттық тағамдар ұсынылып, түркімен ұлттық киімдерінің көрсетілімі өтті.
Мұндай мәдени іс-шаралар бауырлас халықтар арасындағы достықты нығайтып, өзара түсіністік пен құрметке негізделген ынтымақтастықтың дамуына ықпал етеді деп сенеміз.
