Қазақстан Республикасы Ұлттық орталық музейінде Республика күні мерекесіне орай және қазақтың көрнекті композиторы Нұрғиса Тілендиевтің 100 жылдығы аясында «Қазақстан – туған елім, ұлы өлкем» атты мәдени-танымдық іс-шара өтті.
Іс-шараны ҚР Ұлттық орталық музейі директорының міндетін атқарушы Саров Сержан Бараханұлы ашып, еліміздің егемендікке қол жеткізген тарихи кезеңдерін еске алудың, мемлекетіміздің жетістіктерін кеңінен насихаттаудың маңыздылығына тоқталды. Сонымен қатар, жас ұрпақ бойында отансүйгіштік пен ұлттық рухты қалыптастыру — музей мамандарының басты жауапкершіліктерінің бірі екенін атап өтті.
Шараның құрметті қонақтары — тарих ғылымдарының докторы, профессор, ҚР ҰҒА академигі Ханкелді Махмұтұлы Әбжанов және тарих ғылымдарының кандидаты, саяси ғылымдарының докторы, Абай атындағы Қазақ ұлттық педагогикалық университетінің Саясаттану және әлеуметтік-философиялық пәндер кафедрасының меңгерушісі Жомарт Құдайбергенұлы Симтиков өз сөздерінде Республика күнінің тарихи және рухани маңызына кеңінен тоқталды.
Іс-шара аясында қазақтың біртуар композиторы, дирижері, Қазақстанның және КСРО-ның халық әртісі Нұрғиса Атабайұлы Тілендиевтің 100 жылдығына арналған көрме ұйымдастырылды. Көрмеде композитордың мемориалдық музей қорынан алынған құнды жәдігерлер — өмір жолына қатысты фотосуреттер, қолжазбалар, ноталар, жеке қолданған заттары, дирижерлік таяқшасы, марапаттары және басқа да мұралар жұртшылық назарына ұсынылды.
Сонымен қатар, шара барысында «Ақжауын» мемлекеттік камералық оркестрі өнер көрсетіп, ұлттық күй өнерінің тереңдігін, саз өнерінің қуатын паш етті.
