2025 жылғы 31 қазанда Қазақстан Республикасының Ұлттық Орталық музейінде жас зергерлер мен дизайнерлерге арналған KazakhYuvelir 2025 Премиясы байқауының жеңімпаздары мен қатысушыларын марапаттау салтанаты өтті. Бұл байқау ұлттық мұрадан, дәстүрлерден және заманауи өнерден шабыт алған зергерлік әшекейлерді жасаушыларға арналған.
Қазылар алқасының құрамында ҚР қолөнершілер одағының төрайымы А. Бекқұлова, суретші-график, этнограф және өнертанушы Е. Оспанұлы, Қазақстанның еңбек сіңірген қайраткері, Т. Жүргенов атындағы ҚазҰӨА профессоры Е. Даубаев, заманауи мәдениет орталығы «Целинный» директоры Д. Нұрқалиева және басқа да мамандар болды. Олар қатысушылардың ең үздік жұмыстарын таңдап, жеңімпаздарды марапаттады.
Жеңімпаздар келесідей:
1-орын – Жансая Тілебердіқызы
2-орын – Әсем Зейноллаева
3-орын – Александр Цехмайструк.
Іс-шараны «Қазақювелир» АҚ креативтік директоры, CEO Аида Инкербаева ашты. Салтанатты шарада Қазақстан Республикасының Ұлттық Орталық музейінің сыртқы байланыстар бөлімінің жетекшісі Анна Кущенко құттықтау сөз сөйлеп, зергерлік өнер саласындағы ұрпақтар сабақтастығының ұлттық құндылықтар мен дәстүрлерді сақтау жолындағы маңыздылығын атап өтті.
Байқау нәтижелері бойынша Ұлттық Орталық музейде KazakhYuvelir 2025 байқауының қатысушылары мен жеңімпаздарының фотокөрмесі ашылды. Көрме қазіргі заманғы қазақстандық зергерлік өнерге арналған. Көрермендер көне рәміздер мен ұлттық өрнектер қазіргі заманғы пішіндер мен идеялармен үйлескен бірегей авторлық бұйымдарды тамашалай алады.
Фотокөрме 2025 жылғы 14 қарашаға дейін жалғасады.
