Қазақстан Республикасы Ұлттық орталық музейінде 2025 жылғы 17 қараша күні Халықаралық студенттер күніне орай «Ойшылдар алаңы» ғылыми-зияткерлік іс-шарасы өтті.
Ұлттық орталық музейдің мәдени-білім беру ошағы ретінде өскелең ұрпақты тарих, мәдениет, ұлттық құндылықтармен сусындату мақсатында ұйымдастырған шарасы жастардың ой-танымын озық етіп, ғылым мен білімді насихаттаумен қатар, музей мен қаламыздағы жоғарғы оқу орындарының арасындағы ынтымақтастықты да нығайта түсті.
Іс-шарада студенттер тарих, мәдениет, этнография, археология салаларындағы білімдерін сынады.
Шараға әл-Фараби атындағы ҚазҰУ, Абай атындағы ҚазҰПУ және Қазақ Ұлттық қыздар педагогикалық университетінің студенттері қатысты. Аталған оқу орындарынан жалпы саны үш топ құралып, өзара білімдерімен сайысқа түсті. Жүлделі орындар иеленген топтар арнайы дипломдармен марапатталып, студенттерге алғыс хаттар табысталды. Сондай-ақ «Жас таланттар», «Үздік ерікті», «Белсенді студент» номинациялары бойынша жеңімпаздар анықталып, марапатталды.
