2025 жылдың 5 желтоқсанында Қазақстан Республикасының Ұлттық орталық музейінде «KAU School» мектебі оқушыларының «Көк аспан астында» көрмесінің салтанатты ашылуы өтті. Экспозиция Қазақстан Республикасының Тәуелсіздік күніне орай ұйымдастырылды. Тәуелсіздік – елдің бүгіні мен болашағын айқындайтын берік негіз; ол – еркін ойлау, іздену, білім алу және шығармашылықпен айналысу мүмкіндігі. Дәл осы идеяны КАУ мектебінің оқушылары мен ұстаздарының еңбектері бейнелейді. Олар өз жұмыстарын шабытпен, тарихқа құрметпен және Отанға деген шынайы сүйіспеншілікпен орындаған.
Салтанатты ашылу барысында Ұлттық орталық музейдің сыртқы байланыстарды ұйымдастыру бөлімінің жетекшісі Анна Кущенко құттықтау сөз сөйлеп, музейдің балалар шығармашылығын насихаттаудағы маңызды рөлін атап өткен ол:
«KAU мектебі оқушыларының шығармашылық жұмыстары олардың қабілетін ғана емес, Тәуелсіздік құндылықтарын терең түсінгенін де көрсетеді. Мектеп пен музей арасындағы мұндай серіктестік жас ұрпақтың мәдени және рухани құндылықтарын дамытуға тамаша үлгі болады», – деді. Сондай-ақ, Анна Викторқызы музей атынан КАУ директоры Сабирдинова Сабина Әділханқызына және көрме ұйымдастырушысы, көркем еңбек пәнінің мұғалімі Әсия Нұрмолдақызы Мамбетбаеваға алғыс хат табыстады.
Сонымен қатар, КАУ директоры Сабина Әділханқызы оқушыларды алғашқы көрмелерімен құттықтап, былай деді:
«Бұл көрме – біздің оқушыларымыздың таланты мен тынымсыз еңбегінің нәтижесі. Әрбір жұмыс – олардың терең ойының және шығармашылық көзқарасының жарқын көрінісі. Балаларымыздың өнерін осындай маңызды алаңда көрсетуге мүмкіндік берген музей ұжымына алғысымыз шексіз».
Салтанатты рәсім мектеп оқушыларының дайындаған концерттік бағдарламасымен жалғасты. Оқушылардың музыкалық және вокалдық нөмірлері мерекелік атмосфераны ерекше мәнді етіп, шараға жылылық сыйлады. Жас өнерпаздардың орындаулары көрермендерді тәнті етіп, КАУ оқушыларының көпқырлы талантын тағы бір мәрте дәлелдеді.
Көрмеде ұсынылған жұмыстар жас суретшілердің шығармашылық әлеуетін айқын көрсетеді. Балалардың өнері олардың сезімі мен ойын еркін жеткізе алатынын дәлелдейді әрі олардың еңбектері лайықты құрметке ие.
Көрме 2025 жылдың 19 желтоқсанына дейін жалғасады.
