Қазақстан Республикасы Ұлттық орталық музейінде Қазақстандағы Эстония Республикасының Елшілігінің қолдауымен, Эстонияның Ұлттық музейі әзірлеген «Қолмен өрілген қолғап сыры» атты бірегей жылжымалы көрменің салтанатты ашылу рәсімі өтті.
Ғасырлар бойы Эстонияның солтүстік өңірлерінің қатал климат жағдайында қолғаптар күнделікті тұрмыстық қажеттілік қана емес, сонымен қатар сұлулық пен шеберліктің, халық жадында сақталған рухани дәстүрлерге деген құрметтің символы болып келеді. Әрбір өрнек пен таңдалған түс белгілі бір дәуір мен аймақтың болмысын бейнелеп, оны жасаған шебердің қайталанбас қолтаңбасын айғақтайды.
Көрменің тұжырымдамасы «Тілек ағашы» идеясына негізделген. Мұнда қолғаптар сол ағаштың жемістері іспетті – иесінің жан жылуы мен рухани әлемін бойына сіңіріп, көрерменге үнсіз сыр шертеді.
Көрме кураторы – Эстонияның Ұлттық музейінің өкілі Реэт Пиири.
Көрмені Қазақстан Республикасы Ұлттық орталық музейі директорының міндетін атқарушы Сержан Бараханұлы ашты. Ол Қазақстан Республикасындағы Эстония Республикасы Елшілігінің уақытша сенімді өкілі Герри Леск мырзаны эстон халқының жадында сақталған рухани дәстүрлерді насихаттауға бағытталған көрменің сәтті ашылуымен құттықтап, екі ел арасындағы мәдени өзара ынтымақтастықтың одан әрі жалғасуына мүдделі екенін білдірді.
Сонымен қатар, көрменің ашылу рәсімінде Қазақстан Республикасындағы Эстония Республикасы Елшілігінің уақытша сенімді өкілі Герри Леск мырза Сержан Бараханұлына көрмені ұйымдастыруға атсалысқаны үшін алғыс білдіріп, жылжымалы көрме эстон халқының мәдениеті мен дәстүрін, өнерін бейнелейтін эстон қолғаптары келушілердің қызығушылығын тудыратынына сенім білдірді.
