Қазақстан Республикасы Ұлттық орталық музейі ұстаз, сазгер, ақын, қоғам белсендісі Сұлтанова Салтанат Дүйсенқызының «Әкеге сағыныш» атты жас оқырмандарға арналған жинақ кітабының салтанатты тұсаукесер рәсімін өткізді.
Кітаптың негізгі өзегі – әке тұлғасы, отбасы құндылықтары, бала тәрбиесі мен ұлттық рух. Мерекелік шара барысында келушілер автордың шығармашылық жолымен танысып, кітапқа енген балалар өлеңдерінен үзінділер оқыды, автордың әндері орындалды. Шараны салтанатты түрде ашқан ҚР Ұлттық орталық музей директорының музейлік менеджмент және маркетинг жөніндегі орынбасары Арайлы Бақытқызы авторға шығармашылық табыс тіледі. Техника ғылымдарының кандидаты, “Қазақстанның құрметті жолшысы” Құлманов Қалижан Серікұлы, ақын, сазгер, журналист, Қазақ радиосының ардагері, Қызылжар қаласының құрметті азаматы, Президенттің мәдениет жөніндегі және татарлар мен башқұрттар конгрессінің орынбасары, ҚР мен Татар Республикасының білім, мәдениет және денсаулық сақтау саласының еңбек сіңірген қызметкері, Алтын және күміс медаль иегері, “Сарман – Бұл-бұл” татар халық ансамбльінің жетекшісі Ғалымжан Гиряйұлы Тамендаров жылы лебіздерін білдірді.
«Әкеге сағыныш» – жас ұрпақтың жүрегіне жол табатын, үлкендерге ой салатын, қоғам үшін маңызы зор рухани еңбек. Кітап тұсаукесері – әдебиет пен өнерсүйер қауым үшін тағылымды мәдени шара болды.
