Қазақстан Республикасының Ұлттық орталық музейінде Шығыс Жаңа жылы мен Шамдар мерекесіне орай ұйымдастырылған «Шамдар жанған сәт» атты балалар шығармашылығы көрмесінің салтанатты ашылуы өтті.
Көрмеге Алматы қаласындағы бейнелеу өнері студиялары мен көркемсурет мектептерінің оқушылары қатысып, өз туындыларын ұсынды.
Көрме 5 пен 17 жас аралығындағы алматылық жас суретшілердің басын қосып, кескіндеме мен графиканың түрлі техникасында орындалған 100 үздік жұмысты көпшілік назарына ұсынды. Көрменің негізгі тақырыбы – отбасы – басты құндылық болып саналатын мерекелер.
Салтанатты ашылу рәсімінде көрмені ұйымдастырушы, «Сен суретшісің» кескіндеме мектебінің негізін қалаушы Дина Мертенова сөз сөйлеп, қатысушыларды құттықтап, алғыс хаттар табыс етті.
«Шамдар жанған сәт» көрмесі балалар өнерінің мәдениеттер арасын жалғайтын көпірге айналып, жарыққа, шабыт пен өзара түсіністікке толы кеңістік қалыптастыра алатынын айқын көрсетті.
