Қазақстан Республикасы Ұлттық Орталық Музейінде 2026 жылғы 28 ақпаннан 13 наурызға дейін Visa Fashion Week Almaty аясында жас дизайнерлердің Archive Exhibition 2023–2026 көрмесі ашылады.
Archive Exhibition 2023–2026 көрмесі Орталық Азиядағы жас дизайнерлер үшін ең беделді жарыстардың бірі – Next Designer Award empowered by Visa – финалистерінің шығармашылық еңбектерін ұсынады. Бұл экспозиция сәннің дәстүрлі қабылдау шеңберінен шығып, әрбір коллекцияны жеке арт-объект ретінде көрсетеді. Мұнда визуалды поэзия, эмоционалды тереңдік және мәдени мән-мағына қабаттары бірігіп, әрбір мата мен әрбір силуэт шығармашылықтың тікелей құралына айналады.
Көрермендер қазіргі заманғы сән әлеміне ене отырып, форма, текстура, түс және матамен жұмыс тәсілдерінің мағыналық тереңдігі мен визуалды метафоралық қыр-сырымен таныса алады. 2023–2026 жылдар аралығында Next Designer Award empowered by Visa байқауы финалистерінің әрбір жұмысы көркем әрі әсерлі шығармашылық пайым ретінде ұсынылған. Коллекциялар авторлардың жеке тәжірибесін және өзекті әлеуметтік тақырыптарды бейнелейді. Онда экология мен адам жауапкершілігі, психикалық денсаулық, жеке тұлғаны тану мен өзін-өзі анықтау, мәдени жады, әйелдердің күші мен автономиясы, өткенмен бетпе-бет келу және ішкі трансформациялар, сондай-ақ буллинг тәжірибесі секілді тақырыптар көрініс табады. Дизайнерлер сән арқылы бүгінгі маңызды мәселелерді шынайы әрі батыл жеткізіп, подиум мен көрме залын көрерменмен диалог орнатудың ерекше кеңістігіне айналдырады.
2023 жылы іске қосылған Next Designer Award empowered by Visa тек байқау ретінде ғана емес, жас таланттарды қолдауға бағытталған стратегиялық платформа ретінде өзін танытты. Жоба бүкіл Орталық Азияны қамтып, дизайнерлерге кәсіби дамуға, халықаралық деңгейде танылуға және әлемдік сән сахнасына шығуға нақты мүмкіндіктер ұсынады. Көрме аталған бағытты жүйелі түрде жалғастырып, байқау аясында ұсынылған жұмыстарды музей кеңістігіне енгізеді әрі оларды Орталық Азия сән тілінің дамуын айқындайтын мәдени және көркем артефактілер ретінде танытады. Осылайша экспозиция өңірдегі сән үдерістерінің өзіндік көркем шежіресін қалыптастырады. Мұнда әрбір коллекция дербес көркемдік әлем ретінде ұсынылып, дизайнерлер форма, түс, фактура, пропорция және концепциямен жұмыс істеп қана қоймай, көрерменге эмоция мен ой-толғаныс сыйлайтын визуалды баяндаулар қалыптастырады.
Visa Fashion Week бас директоры Бауыржан Шадибеков былай деп атап өтті: «Біз үшін бұл көрме Next Designer Award empowered by Visa жобасының бірнеше маусымының қорытындысы ғана емес. Бұл — сәнге өнер ретінде қарап, бір сәтке тоқтап, терең зер салуға берілетін мүмкіндік Біз жас дизайнерлер энергиясының мәдениет, болмыс және шығармашылық ізденіс туралы сыр шертетін визуалды формаларға трансформацияланып жатқанын көріп отырмыз. Archive Exhibition 2023–2026 — креатив болашақта халықаралық әлеуеті бар брендтердің негізіне айналатын тірі архив. Мұндағы әрбір образ — жай ғана коллекция емес, мағынаға, визуалды сұлулыққа және концептуалдық қуатқа толы дербес өнер туындысы. Бұл жоба шығармашылық энергияның жаңа брендтерге, экономикалық дамуға және халықаралық деңгейде танылуға негіз бола алатынын көрсетеді».
Көрменің бірегейлігі дизайнерлердің шығармашылық жолын көрсетуінде. Мұнда олардың алғашқы батыл тәжірибелері мен өзіндік стильді іздеу кезеңінен бастап, авторлық қолтаңбасының қалыптасуына, сондай-ақ кең аудиторияның ықыласына бөленген, концептуалды тұрғыда ойластырылған әрі коммерциялық тұрғыдан табысты коллекциялардың дүниеге келуіне дейінгі шығармашылық жолы бейнеленеді. Бұл классикалық ретроспектива емес, сән, заманауи өнер және өңірдің мәдени болмысы тоғысқан тұста қалыптасқан тірі көркем шежіре. Мұнда Орталық Азия сәні дербес, кемелденген әрі мән-мағынасы терең мәдени және арт-феномен ретінде танылады. Көрме дизайнерлер, кураторлар, сарапшылар мен көрермендер арасындағы диалогқа кеңістік қалыптастыратын ашық мәдени платформа ретінде ойластырылған. Мұнда сән тек индустрия ретінде ғана емес, сонымен қатар Орталық Азияның көркемдік және зияткерлік кеңістігінің маңызды бөлігі — өз дәуірінің мәдени өзгерістерін, әлеуметтік мән-мағыналарын және эмоциялық ахуалын бейнелей алатын тіл ретінде ұсынылады.
«Бүгінде Next Designer Award empowered by Visa жобасының миссиясы — Орталық Азиядағы жас дизайнерлерге арналған ашық бастапқы алаң қалыптастыру. Қазақстанда бастау алған жоба бүгінде бүкіл өңірді қамтып, жас авторларды біріктіріп, олардың халықаралық деңгейде танылуына мүмкіндік береді. Бізді дизайнерлердің өздері — олардың батылдығы, болмысын іздеуі, форма, мата және силуэт арқылы шынайы ой айтуы шабыттандырады. Дәл солар жобаның басты энергия көзіне әрі негізгі мәніне айналады», — деп толықтырды Бауыржан Шадибеков.
Next Designer Award empowered by Visa байқауы әр маусым сайын жаңа есімдерді таныстырып келеді, ал Алматыдағы ҚР Ұлттық орталық музейінде өтетін көрме осы дизайнерлердің халықаралық деңгейде танылуына бастайтын маңызды баспалдақтардың біріне айналып отыр. Жоба қатысушыларының көпшілігі бүгінде мультибрендтік дүкендерде ұсынылып, өңірлік нарық шеңберінен шыға отырып, өз брендтерін белсенді түрде дамытып келеді. Next Designer Award empowered by Visa финалистерінің Visa Fashion Week Tashkent аясындағы қатысуы Орталық Азия дизайнерлерін жаһандық сән және мәдени контекстке интеграциялаудың қосымша қадамына айналып, олардың кәсіби әрі көркемдік тұрғыдан өсуіне жаңа мүмкіндіктер ашады.
Archive Exhibition 2023–2026 көрмесінің қатысушылары:
- I маусым: Әсел Шыңғысова, Ақмарал Жарасқызы, Вилермор, Тоқтар Сейілбек.
- II маусым: Әсем Сапарғали, Таңшолпан Омарова, Рассул Социал.
- III маусым: Аревик, Фариза Бекімбет, Мари Айрапетян, Айкен Дербессалиева.
- IV маусым: Әсем Ұрынбай, Мари және Дмитрий, Галима Күлчикова, Жасмин
Акопян.
- V маусым: Айзада Балабекова, Томирис Талғат, Айлен Аяулым, Нұрали Канкелді,
Динара Қасымова, Әдел Құнанбаева, Негина Негматова, Саби Жүсіпбаева.
Archive Exhibition 2023–2026 көрмесі заманауи сән мен өнер әлеміне терең бойлауға, өңірдің жетекші дизайнерлерінің өзекті бағыттарын танып-білуге және Орталық Азияда жаңа мәдени әрі көркем тілдің қалыптасуына куә болуға бірегей мүмкіндік ұсынады.
Next Designer Award empowered by Visa — 2023 жылы Visa Fashion Week Almaty экожүйесінің бір бөлігі ретінде іске қосылған жас дизайнерлерді қолдауға арналған жыл сайынғы конкурстық-білім беру платформасы. Байқау жылына екі рет өткізіліп, бүкіл Орталық Азия өңірін қамтиды және қатысушыларға кәсіби өсуге, халықаралық танымалдыққа қол жеткізуге, арт және сән бағытындағы коллаборацияларға қатысуға, сондай-ақ қаржылық әрі сараптамалық қолдауға ие болуға мүмкіндік береді.
Visa Fashion Week Almaty баспасөз қызмет. Телефон: 8 (708) 759-53-99
Көрменің кестесі және жұмыс уақыты: 28.02.–13.03.2026, сағат 9:00–18:00, сейсенбі (демалыс).
Көрмеге кіру ақылы (билеттер музей кассасында сатылады).
Мекен-жайы: Қазақстан Республикасы Ұлттық орталық музейі, Самал-1, 44. Телефон: 264 46 50
