2026 жылғы 18 наурызда сағат 11:00-де Қазақстан Республикасы Ұлттық орталық музейінде «Наурызнама» онкүндігінің Ұлттық киім күніне орай «Ұлттық киім – ұлт мәдениетінің жарқын көрінісі» атты көрменің салтанатты ашылуы өтеді.
Дәстүрлі киім – кез келген халықтың мәдени коды мен тарихи жадының айқын көрінісі. Ол арқылы ұлттың дүниетанымы, шаруашылық-тұрмыстық ерекшелігі, табиғи ортаға бейімделуі, әлеуметтік құрылымы мен эстетикалық талғамы танылады. Бүгінде түпнұсқалық пішіні мен құрылымы сақталған дәстүрлі киім үлгілері негізінен музей қорларында ғана сақталған.
Көрменің мақсаты – қазақ халқының ұлттық киімдерін ұлт мәдениетінің маңызды құрамдас бөлігі ретінде насихаттау және олардың заманауи сән кеңістігімен сабақтастығын көрсету.
Көрмеде ұсынылған мәдени құндылықтар қазақ қоғамындағы жас ерекшелігіне, әлеуметтік мәртебесіне, отбасылық жағдайына қарай киім үлгілерінің айырмашылығын айқын көрсетеді. Көрме экспозициясының елеулі бөлігіне киім дайындауға қажетті құралдар, сондай-ақ өз дәуірінің шынайы келбетін бейнелейтін фотосуреттердің жасанды зерде арқылы түрленген нұсқалары қойылған. Келушілер фотосуреттердегі QR-кодтар арқылы түпнұсқа сурет пен оның сипаттамалық мәліметтерін жасанды зерде нұсқасымен салыстыра қарай алады.
Киім тек тұрмыстық қажеттілік қана емес, сонымен бірге танымдық әрі рәміздік қызмет атқарған. Әрбір ою-өрнек пен әшекейде халқымыздың дүниетанымы мен рухани құндылықтары көрініс тапқан.
Тәуелсіздік жылдарында ұлттық киімге деген көзқарас жаңаша сипат алып, ол этномәдени бірегейлікті айқындайтын маңызды белгіге айналды. Бүгінде ұлттық киім элементтері қоғамдық іс-шараларда, мәдени жобаларда және күнделікті өмірде кеңінен қолданылып келеді.
Бұл туралы Қазақстан Республикасының Президенті Қасым-Жомарт Тоқаев Ұлттық Құрылтайдың IV отырысында: «Ұлттық киімнің өзі – ұлт мәдениетінің жарқын көрінісі. Сондықтан ұл-қыздарымыз ұлттық киімді тек мерекеде емес, ұдайы киіп жүрсе де жарасымды болатыны сөзсіз», – деп атап өткен болатын.
Көрме аясында:
- экскурсиялар;
- этнограф-ғалымдармен, этнодизайнерлермен сұхбаттасу;
- ұлттық киім үлгілерінің дефилесі ұйымдастырылады.
Аталған мәдени шара ұлттық мұраны жаңғыртуға, жас ұрпақтың тарихи санасын қалыптастыруға және ұлттық бірегейлікті нығайтуға бағытталған.
Көрмеге БАҚ өкілдері, барша қала тұрғындары мен қонақтары шақырылады.
Байланыс тел.: 8(727)264-09-66, 264-55-77
