Қазақстан Республикасы Ұлттық орталық музейінде «Genius» даму орталығының ұйымдастыруымен «Анамның көркем келбеті» атты балалар көркемөнер көрмесінің ашылу салтанаты өтті. Аталған көрме әрбір баланың өміріндегі ең жақын әрі қымбат жан — анаға арналған.
«Анамның көркем келбеті» көрмесі баланың жан-жақты дамуына көркем білімнің маңызын, отбасыға деген құрметті қалыптастырудағы және рухани, отбасылық құндылықтарды нығайтудағы рөлін айқын көрсетеді. «Genius» балалар орталығының педагогтері жас суретшілерге шығармашылық арқылы өз сезімдерін ашып көрсетуге және қарапайым дүниелердің өзінен әсемдікті көре білуге бағыт-бағдар беретін тәлімгер қызметін атқарады.
«Анамның көркем келбеті» көрмесінде 50 өнер туындысы ұсынылған.
Көрменің ашылуында ҚР Ұлттық орталық музейі директорының орынбасары – Балаева Арайлы Бақытқызы, «Genius» даму орталығының ұстазы Сейіткерімова Айнұр Әмірханқызы және орталықтың жетекшісі – Өсірбаева Айдана Есенәліқызы сөз сөйлеп, балаларға жарқын болашақ тіледі.
Сонымен қатар, көрме қатысушылары мереке қарсаңында арнайы дайындалған шағын концерттік бағдарламаларын келушілер назарына ұсынды.
