Қазақстан Республикасы Мемлекеттік орталық музейінде дарынды суретші, Қазақ өнерінің қайраткері, халықаралық көрмелердің лауреаты Нұрбазар Төлеуұлы Қожинның шығармашылығына арналған «Ұлы даланың шежіресі» атты еске алу көрмесі ашылды.
Көрмеде көрермендер қазақ руханиятын терең сезіммен бейнелеген суретшінің 50-ге жуық туындылары мен жеке заттарымен танысты. Оның шығармалары – ұлттық болмыстың үнсіз жыршысы, тарих пен тағдырды, туған жерге деген махаббатты қылқаламмен өрген туындылар.
Көрменің ресми бөлімінде ҚР Мемлекеттік орталық музейінің ғалым хатшысы Ерсін Жайнақов көрменің маңыздылығын атап өтсе, ҚР Суретшілер одағының төрағасы, суретші Өмірбек Орынбасарұлы Жұбаниязов Қожинның бейнелеу өнеріне қосқан үлесіне тоқталды. Өнертанушы Ләйлә Абдығаниқызы Кенжебаева, шығармашылық тұлға Ерсаин Жапақ, бауыры Нұрлыбай Қожин Төлеуұлы және жары Бақытгүл Әбдібаева суретшінің мұрасы мен рухани әлемі жайлы жүрекжарды пікірлерін білдірді.
Көрме 2025 жылғы 17 қазанға дейін жалғасады.
