2025 жылғы 8 мамырда сағат 11:00-де Қазақстан Республикасының Орталық мемлекеттік музейінде Ұлы Отан соғысындағы Жеңістің 80 жылдығына арналған «Ерлік дастаны: ұрпаққа ұран, тарихқа тағзым» атты көрме өтті.
Көрменің мақсаты – Ұлы Отан соғысы жылдарындағы қазақстандықтардың ерлігі мен батырлығын көрсету, халқымыздың фашизмге қарсы күрестегі тарихи үлесін дәріптеу және жас ұрпақ бойында Отанға деген мақтаныш пен ата-бабалар ерлігіне деген құрмет сезімін қалыптастыру болды.
Экспозицияда тыл еңбегінің маңыздылығын айқындайтын фотодеректер, құжаттар мен күнделікті тұрмыстық заттар ұсынылды. Азық-түлік пен тауарларды бөлу жүйесін бейнелейтін карточкалар, тылдың ауыр еңбегі мен майданға қосқан үлесі кеңінен көрсетілді.
Көрменің құнды жәдігерлерінің бірі – Брест бекінісінің қабырғасынан алынған кірпіш фрагменті болды. Онда штыктің ұшымен жазылған «УМ.РАЮ АХМ» деген жазу сақталған. Бұл жәдігерді 1963 жылы Брест бекінісін қорғаушылардың бірі Қ. Иманқұлов алып келген. Сонымен қатар, көрмеде 1941 жылғы 26 маусымда жауынгерлік ұшуды орындау кезінде қаза тапқан ұшқыш-оқшышы, кіші сержант Бахтураз Бейсекбаевтың жеке марапаттары — Ресей Федерациясының «Алтын Жұлдыз» медалі мен Қазақстанның «Халық Қаһарманы» ордені қойылды. Музей қорының соғыс қарулары да ерекше қызығушылық тудырды.
Көрменің ашылу салтанатында Қазақстан Республикасының Орталық мемлекеттік музейі директорының міндетін атқарушы Сержан Бараханұлы Саров құттықтау сөз сөйледі. Сондай-ақ, шараға тарих ғылымдарының докторы, жазушы-журналист, зерттеуші Ләйлә Сейсембекқызы Ахметова, профессор, журналистер академиясының академигі Валерий Айтмукашевич Жандаулетов, сондай-ақ Ұлы Отан соғысы ардагерлерінің ұрпақтары – Дина Шавкатовна Чултурова мен Жумагали Паримбекұлы Маханов қатысып, өз естеліктерімен бөлісті.
Көрмені Ұлы Отан соғысына қатысқан жауынгерлердің туыстары, Қазақстан Республикасы Ұлттық ұланының курсанттары, жоғары және арнаулы орта білім беру ұйымдарының студенттері, сондай-ақ №19 жалпы білім беретін мектептің оқушылары мен өзге де білім беру мекемелерінің өкілдері тамашалады.
Бұл көрме – соғыс жылдарының ауыртпалығы мен қаһармандық рухын нақты жәдігерлер мен адам тағдырлары арқылы көрсеткен тағылымды шара болды. Көрермендер Ұлы Жеңістің тарихына батырлардың жеке өмірі мен ерлігі арқылы терең бойлай алды.
