2026 жылдың 2 наурызында сағат 16:00-де Қазақстан Республикасының Ұлттық Орталық музейінде Қазақстанның халық қайраткері, Қазақстан Көркемөнер академиясының және «MONDIAL ART ACADEMIA» Дүниежүзілік өнер академиясының академигі Болат Мұхамедиевтің «ҚОЛӨНЕР ТАРИХЫ» атты жеке көрмесінің ашылуы өтеді.
Болат Мұхамедиев – Қазақстанның көрнекті суретшілерінің бірі. Оның шығармашылық қызметі елу жылдан астам уақытты қамтып, кітап графикасы, кескіндеме, абстракция, сәулет, мүсін, дизайн және фотография сынды бірегей көркемөнер салаларын тоғыстырған. Ол 1957 жылғы 12 наурызда Қарағанды облысында дүниеге келген. Суретшінің кәсіби қалыптасу жолы Алматы көркемсурет училищесінен, Львов кітап өнері академиясынан басталып, Мәскеу полиграфиялық институты мен Дрезден өнеркәсіптік графика университетінде жалғасын тапты.
Болат Мұхамедиев көптеген халықаралық марапаттардың иегері, соның ішінде 2023 жылы Парижде өткен абстракционистердің дүниежүзілік байқауында алтын медальмен марапатталған. Ол әлемнің 12 елінің құрметті суретшісі атанған. Суретшінің есімі «1945-1991 жж. балалар кітабының суретшілері» атты дүниежүзілік энциклопедияға енгізілген, ал оның жетістіктері америкалық Forbes басылымында жарияланған.
1982-1991 жж. аралығында Б. Мұхамедиев Германия, Болгария, Чехословакия, Польша, Түркия және Жапонияда өткен кітап-журнал өнері саласындағы халықаралық байқауларда алты мәрте жүлдеге ие болды. 1992-2023 жж. 11 тақырыптық стела, 50-ден астам шағын сәулеттік формаларды жасап, бес сәулеттік жоба әзірледі. «Білім және еңбек» журналында жұмыс істеген жылдары суретші 24 мұқабаны безендірсе, «Қазақстан» баспасында көркем, балалар және ғылыми-көпшілік әдебиеттерді қоса алғанда, 300-ден астам басылымды көркемдуге қатысқан. Оның кітаптары Мәскеу мен Дрездендегі көрмелерде I және II дәрежелі дипломдармен марапатталған.
1995 жылдан бастап Болат Мұхамедиев графикалық жұмыстар мен дизайн жасау барысында цифрлық технологияларды белсенді қолдана бастады. Бұл оған жарнамалық өнімдер, сәулеттік жобалар мен көрме экспозициялары бағытында табысты жұмыс істеуге мүмкіндік берді.
Б. Мұхамедиев бейнелеу өнерінің бірнеше жанры мен бағытында – дәстүрлі және цифрлық кескіндеме, мүсін, графика салаларында еңбек етіп, жоғары деңгейдегі детализациясымен ерекшеленетін күрделі композициялар жасайды. Оның жүзеге асырған маңызды мүсіндік жобаларының қатарында Қарағанды қаласында ғарышкер Т.Әубәкіровтің 70 жылдығына арналған «Даладан ғарышқа», Егіндібұлақ кентінде Қазыбек бидің 350 жылдығына арналған «Шежіре ағашы», Астана қаласындағы «Green Quarter» тұрғын үй кешенінің стеласы, Новоникольск-Зенченко кентіндегі «Алтын масақ» стеласы, Алматы қаласындағы «Nauryzbai audany» стела-көрсеткіші, Мерсин қаласындағы «Түркия Республикасының құрылғанына 100 жыл» монументі, Ұлытаудағы «Ратонда» аркасы және басқа да туындылар бар.
Аталған көрме суретшінің шығармашылық қызметінің 50 жылдығына орай ұйымдастырылып, оның кәсіби жолының негізгі кезеңдерін және көркем ойларының көпқырлылығын айқындайтын ауқымды ретроспектива болып табылады.
Экспозиция 1973 жылдан бүгінгі күнге дейінгі кезеңді қамтиды. Онда Алматы көркемсурет училищесінде (АХУ) оқыған жылдары орындалған алғашқы жұмыстары мен соңғы жылдардағы кемелденген әрі заманауи жобалары ұсынылған. Мұндай хронологиялық және тақырыптық әралуандылық авторлық танымның дамуын, көркемдік басымдықтардың өзгеруін және шығармашылық мүмкіндіктердің кеңеюін айқын көрсетеді.
Суретшінің шығармашылығы дәстүрлі бейнелеу өнерімен ғана шектелмейді. 1990-жылдардан бастап ол бірқатар аралас және пәнаралық бағыттарда белсенді жұмыс істей бастады. Экспозицияда кітап графикасының үлгілері, плакаттар, кітаптар мен журналдарға арналған иллюстрациялар, кескіндеме туындылары, компьютерлік графика жобалары, фотосуреттер, сондай-ақ сәулет және интерьер дизайны саласындағы әзірлемелер ұсынылған. Көрмеде суретшінің 120-дан астам өнер туындысы қойылған.
Қазақстан Республикасы Ұлттық орталық музейі барша өнерсүйер қауымды Болат Мұхамедиевтің бірегей шығармаларымен танысып, оның шығармашылық көзқарасынан шабыт алуға шақырады.
Ашылу уақыты: 2026 жылы 2 наурыз, сағат 16:00-де.
Өтетін орны: Қазақстан Республикасы Ұлттық орталық музейі, Алматы қ., Самал-1, 44-үй.
Көрме 2026 жылдың 16 наурызына дейін жалғасады.
