2025 жылғы 19 қыркүйек пен 3 қазан аралығында Қазақстан Республикасы Мемлекеттік орталық музейі суретші ABTU ANET-тің «МЕНІҢ ҮЙІМ» атты жеке көрмесін ұсынады. Экспозиция табиғатты қорғау идеясын арқау еткен, пейзаж арқылы экологиялық үндеуге айналған кескіндемелік шығармалардан тұрады. 2023–2024 жылдары жазылған отызға жуық туынды Алматы облысының ең көркем әрі нәзік табиғи аймақтарын — Қайыңды мен Көлсай көлдерінен бастап, Шарын шатқалы мен Іле Алатауына дейін — бейнелейді.
Abtu Anet, бұған дейін Art Stasy атымен танылған суретші, бұл серияны табиғаттың бұрынғы қол тимеген аймақтарының жаппай туризм салдарынан қалай өзгеріп жатқанын өз көзімен көргеннен кейін жаза бастады. Көлсай, Есік, Шарын және Үлкен Алматы көліне жасаған сапарлары оған шабыт беріп қана қоймай, экологиялық мәселелерге көркемдік тұрғыдан үн қатуға түрткі болды. Сол әсерлердің нәтижесінде жазылған кенептегі кескіндемелер — суретшінің жастық шағында көрген табиғат аясындағы естеліктері мен жан дүниесіне тыныштық сыйлаған, қорғап қалғысы келетін ерекше мекендерге деген сағынышының көрінісі.
Суретшінің шығармашылық лақап аты — Abtu Anet — күн құдайы Ра-ның қайығын қорғайтын ежелгі мысырлық балық бейнесіндегі тәңірлерге сілтеме жасайды. Бұл символизм оның тек өнерде ғана емес, шынайы өмірде де бағыт көрсетуші әрі қорғаушы болуға ұмтылатын миссиясын айшықтайды.
«Менің үйім» көрмесі белгілі бір мағынада жаңа кезеңнің, қайта өрлеудің символы ретінде қарастырылады. Экспозициядағы әрбір туынды — тек пейзаж ғана емес, табиғатқа құрметпен және сақтықпен, саналы түрде қарауға шақыратын визуалды үндеу. Көрмеде ұсынылған бірнеше кескіндеме халықаралық деңгейде танылып, Лондонда өткен беделді Golden Talent байқауында бірінші орындарды алды.
Көрменің мақсаты — өнер мен экологиялық белсенділікті біріктіріп, көрерменді көркем бейненің күші арқылы табиғатқа қамқор болуға шабыттандыру. «Менің үйім» көрмесі — эмоциялық толғанысты тудыратын өнер туындыларымен танысып қана қоймай, тірі ортаны сақтауда өз жауапкершілігіңді түсінуге мүмкіндік береді.
Көрме 2025 жылғы 19 қыркүйек пен 3 қазан аралығында өтеді.
