2026 жылғы 4 ақпанда Қазақстан Республикасы Ұлттық орталық музейінде қазақ поэзиясының көрнекті өкілі, ақын Мұқағали Мақатаевтың 95 жылдығына арналған «Жырлайды жүрек» атты әдеби-сазды кеш пен жылжымалы көрме ұйымдастырылды.
Аталған мәдени іс-шара Алматы облысының музейлер бірлестігіне қарасты Мұқағали Мақатаевтың әдеби-мемориалдық музейі және Жүсіпбек Елебеков атындағы республикалық эстрада-цирк колледжімен бірлесіп өткізілді.
Іс-шараның мақсаты – Мұқағали Мақатаевтың өмірі мен шығармашылығын кеңінен насихаттау, оның әдеби мұрасының қазақ руханиятындағы маңызын көпшілікке таныту.
Әдеби-сазды кеш барысында ақынның келіні, әдебиет зерттеушісі Бақытгүл Айдарова, журналист Дүйсен Мағлұмов, ақын Бақыт Беделхан және Қазақ радиосы Алматы студиясының жетекшісі Бақыт Жағыпарұлы сөз сөйлеп, Мұқағали Мақатаевтың шығармашылық жолы, азаматтық болмысы және поэзиясының көркемдік ерекшеліктері жөнінде ой бөлісті.
Кеш аясында ақынның таңдаулы өлеңдері оқылып, Мұқағали Мақатаевтың сөзіне жазылған әндер мен әдеби-сазды композициялар ұсынылды.
Сонымен қатар, іс-шара барысында Бақытгүл Айдарова Мұқағали Мақатаевтың қолданысында болған, қолының ізі сақталған тұрмыстық бұйымдарын, жеке күнделігін және ақын өлеңдерінің түрлі тілдерге аударылған жинақтарын Қазақстан Республикасы Ұлттық орталық музейінің қорына салтанатты түрде табыс етті.
Іс-шара аясында көрермендерге Алматы облысы Райымбек ауданы Қарасаз ауылында орналасқан Мұқағали Мақатаевтың әдеби-мемориалдық музейі қорынан әзірленген арнайы жылжымалы көрме ұсынылды. Көрмеде ақынның жеке заттары, өмір жолы мен шығармашылығын танытатын фотосуреттер, қолжазбалар мен кітаптар қойылды.
Әдеби-сазды кеш пен көрмеге мәдениет және өнер саласының өкілдері, әдебиеттанушылар, студенттер және қала тұрғындары қатысты.
