01-03.03.2024 ж. Орта-Азия қолөнер шеберлерінің көрме-жәрмеңкесі «ҚЫЗҒАЛДАҚТАР УАҚЫТЫ»

Табиғат көгеріп, күн шуағын шашып, жаңа өмірге бастайтын көктемнің алғашқы айы – ол Наурыз.

8 Наурыз әйелдердің ең сүйікті мерекелерінің бірі. Бұл мерекенің символы - қызғалдақтар. Сондықтан біздің жәрмеңке «ҚЫЗҒАЛДАҚТАР УАҚЫТЫ» деп аталады.

Әйелдер мерекесі қарсаңында 2024 жыл, 1-3 наурызда ҚР Мемлекеттік Орталық музейінде Орта-Азия қолөнер шеберлерінің көрме-жәрмеңкесі өтеді. Көрме-жәрмеңкеге Қазақстан, Қырғызстан, Өзбекстан және Түркменістан елдерінің әр аймағынан келген қолөнер шеберлер қатысады. Жәрмеңкеде Сіздер әр шебердің өз қолымен жасаған бұйымдарымен: дизайнерлік киімдер, бисерден жасалған бижутериялар, авторлық теріден, киізден, күмістен, тастардан жасалған әшекей бұйымдармен танысып, сатып ала аласыздар. Тағы да көптеген кәдесыйлар болады.

Сіздерді көрме-жәрмеңкені тамашалауға келген қонақтар арасынан көруге асықпыз!

Өздеріңізді және жақындарыңызды, туған-туыстарыңызды ерекше сыйлықтармен қуантып, көңілін көтеріңіз!

Сонымен қатар жәрмеңке аясында үш күн бойы сағат 11.00 – 16.00 дейін шеберлік сабақтар өтеді:

• керамикалық саз балшықтан зергерлік бұйымдар мен әр түрлі фигураларды және періштелерді мүсіндеу;
• табиғи балауыздан шамдар жасау.

Көрме-жәрмеңкенің жұмыс уақыты: 1-3 наурыз 2024 жыл, сағат – 9.00 - 18.00

Өтетін орны: Самал-1, 44 үй

15.02.2024 «Қазақ киносының жарық жұлдызы» мәдени-танымдық іс-шарасы өтеді.

Қазақстан Республикасы Мемлекеттік орталық музейі Шәкен Айманов атындағы «Қазақфильм» киностудиясымен бірлесе отырып, кинорежиссер, Қазақстан мен КСРО халық әртісі Шәкен Аймановтың 110 жылдығына арналған «Қазақ киносының жарық жұлдызы» мәдени-танымдық іс-шарасын ұйымдастырды.

Алғашқы сөз  ҚР Мемлекеттік орталық музейі директорының ғылыми жұмыстар жөніндегі орынбасары Ғалия Теміртонқызы мен Ш.Айманов атындағы «Қазақфильм» АҚ президенті, Қазақстанның еңбек сіңірген қайраткері Азамат Сатыбалдыға берілді. Сондай-ақ Ш. Аймановтың шәкірттері, қазақ киносының шоқтығы биік тұлғалары Қазақстанның халық әртісі Асанәлі Әшімов, Қазақстанның Халық әртісі Нұржұман Ықтымбаев сынды өнер қайраткерлері ұлттық театр өнері мен кино саласының қалыптасуына бүкіл ғұмырын арнаған Шәкен аймановтың өмір жолынан сыр шертіп, естеліктерімен бөлісті. 

Шара аясында ҚР Мемлекеттік орталық музейі қорындағы Шәкен Аймановтың фотоматериалдары, марапаттары, жеке заттарынан құрылған шағын көрме ұйымдастырылды. Көрмеден орын алған көрнекті экспонаттардың қатарында Ш. Аймановтың «Алдар көсе» фильміне түскенде қолына ұстаған асатаяғы, өзі шерткен домбырасы, шахмат тақтайшасы, түсірілім алаңында пайдаланған рупр, сондай-ақ 1970 жылы «Атаманның ақыры» фильмі түсірілген камера, киімдері, қаламсаптары мен үстел сағаты секілді  т.б ерекше жәдігерлер бар.

Шараға белгілі қоғам қайраткерлері, студенттер және БАҚ өкілдері қатысты.  

29.02.2024 Алғыс айту күні

Көктемнің алғашқы күні Қазақстанда Алғыс айту күні атап өтіледі.

Алғыс айту күні - ең алдымен елімізде тыныштық, өзара сенімділік пен барлық Қазақ еліне деген құрметтің орнығуына негіз болған Президенттің бейбітшілік пен келісім саясатының салтанатты күні. Бұл-тағдыр тәлкегімен Қазақстан жеріне еріксіз қоныс аударған түрлі этностардың миллиондаған өкілдерінің құтты қонысына айналған қасиетті қазақ жері мен қонақжай қазақ халқына терең тағзымының белгісі. Қазақ халқы қиын-қыстау заманда олардың басына түскен ауыртпалықты қайыспай бірге көтере білді, бұл бүгінгі таңда еліміздегі түрлі ұлт өкілдерінің арасындағы адамгершілік қарым-қатынастың өнегелі өлшеміне айналды.

Қазақстан Республикасы Мемлекеттік орталық музейінде 2024 жылдың 29-ақпан күні, сағат 15.00-де «Бір шаңырақ астында» мәдени іс-шарасы өтеді.

Аталған іс-шараға Алматы қаласындағы Республикалық Достық үйіне қарасты «Ватандаш» қырым татарларының мәдени орталығы, Қазақстан күрдтерінің «Барбанг» қауымдастығы, «Ренессанс» Алматы мәдени-этникалық қоғамы, «Вензь» поляк мәдениетінің орталығы», Алматы облысының «Вайнах» шешен-ингуш бірлестігі, «Вошал» ингуш этно-мәдени орталығы» т.б этно-мәдени орталықтар қатысады. Шара аясында халықтық-қолданбалы өнері көрмесі және концерттік бағдарлама ұйымдастырылады.

"Ұлы даланың ұлттық дәстүрлері" II Халықаралық ғылыми форумы

2024 жылдың 14-15 наурыз күні Қазақстан Республикасы Мәдениет және ақпарат министрлігінің Мәдениет комитеті Қазақстан Республикасы Мемлекеттік орталық музейі, ТҮРКСОЙ Халықаралық ұйымы, Ахмет Байтұрсынұлы атындағы Тіл білімі институты және Алматы қаласы музейлер бірлестігі  ұйымдастырған  "ҰЛЫ ДАЛАНЫҢ ҰЛТТЫҚ ДӘСТҮРЛЕРІ" ІІ-ші  Халықаралық ғылыми форумы өтті.

Халықаралық форум Қазақстанда Наурыз мерекесін 14-і мен 23-і аралығында жаңа форматта тойлаудың «Наурызнама» онкүндігіне сәйкес, «Көрісу күні – Амал мерекесі» күнінен басталып, ізгілік пен мейірімді және татулықты насихаттауға арналған 15 наурыз –– «Қайырымдылық» күні жалғасын тапты.

Форум жұмысы Наурыз мерекесінің мазмұнын байытып, оны барынша ерекшелеп, жаңаша атап өтуге ықпал етті.  Сонымен қатар, елдегі жаңа құндылықтарды қалыптастыру, сенім, ынтымақтастық пен ұлттық бірлікті нығайтудағы рөлін арттыруға, мереке мазмұнын жаңа идеялық мағыналармен толықтыруға, қоғамдық пайдалы әлеуеті бар мерекелік күннің мазмұнын, шығармашылық тәртібін жаңартуға бағытталды.

"ҰЛЫ ДАЛАНЫҢ ҰЛТТЫҚ ДӘСТҮРЛЕРІ" ІІ-ші  Халықаралық ғылыми форум жұмысы музей этнографиялық коры негізінде қалыптастырылған  «ТӘРБИЕ БАСЫ – ТАЛ БЕСІК» көрмесінің салтанаты ашылуымен басталды.  Көрме қазақ халқының сонау түркі заманынан күні бүгінге дейінгі мәдени мұрасын, ғасырлар  бойы  болашағын қалыптастырудағы  тәлімдік жүйесі мен ұлттық тәрбиесін дәріптеу және насихаттауға арналған.

Көрмеге 11 бесік және 70-тен астам ұлттық қол өнерінің жауhарлары: ежелгі Сарайшық және Талғар қалаларына жүргізілген археологиялық қазба жұмыстары кезінде табылған түбек, шүмектер; кілем және тоқыма бұйымдары, бесік жабдықтары және т.б. қойылды. Көрме экспозициясында ерекше орын алған бірегей жәдігерлер – музей қорына саяхатшы, фотосуретші Таймас Нұртаев тапсырған құба талдан иіліп, шеге қолданбай жасалған ең көне тал бесік және 1904 жылы оймыштау тәсілі арқылы жасалып, төрт ұрпақтан 26 бала бөленген бесік те көрермен назарына ұсынылды. Сонымен қатар форум барысында музей жанашыры Алғазы Ернат есімді азамат 1957 жылы жасалған бесікті музей қорына сыйға тартты.

Форум жұмысын Қазақстан Республикасы Мәдениет және ақпарат министрлігі Мәдениет Комитетінің Музей қызметі және материалдық емес мәдени мұра басқарма басшысы Пазылова Гульзейнеп Анафияқызы ашты. Ол өз құттықтау сөзінде: «Форум түркітілдес халықтардың этногенез тарихын, мәдениеті мен өнерін зерттеудің өзекті мәселелері талқыланатын ірі ғылыми-мәдени шара. Форум барлық түркі халықтарының этникалық тарихы мен мәдени мұрасы туралы білімді кеңінен насихаттауға ықпал етеді. Сонымен қатар, бүгінгі күнге дейін өзектілігін жоғалтпаған ежелгі көктем мерекесінің терең мағынасы насихатталуда. Сондықтан, бүгінде Қазақстан ғана емес, Орталық Азия елдері музейінің ғалымдары мен мамандары жиналған форум бүкілхалықтық мерекені танымал ету, сондай-ақ, оның тарихы мен ерекшеліктерін ғылыми зерттеу бойынша бірлескен идеялар мен тәжірибелерді әзірлеу, оны іс жүзінде жүзеге асыруға көмектеседі деп сенемін», – деді.  

Сондай-ақ «ТҮРКСОЙ» Халықаралық ұйымының түркітілдес қауымдастықтарымен байланыс бөлімінің меңгерушісі, ТҮРКСОЙ музейлер қауымдастығының бас үйлестірушісі, т.ғ.д., Мовсюмлю Джавид Эльшад оглу сөз алып, ҚР Мемлекеттік орталық музейінде өтіп жатқан  "ҰЛЫ ДАЛАНЫҢ ҰЛТТЫҚ ДӘСТҮРЛЕРІ" ІІ-ші  Халықаралық ғылыми форумының түркі халықтарының тіл және өнер, тарихи-мәдени мұрасының музей саласы аясында кеңінен насихатталуы түркітілдес халықтардың ынтымақтастығын арттыруға ықпал ететінін атап өтті. Ал Түркия Республикасының Алматы қаласындағы Бас консулы Эврен Мюдеррисоглу арнайы сөзінде осынау ауқымды шараның Қазақстан және Түркия арасындағы ғылым, білім, мәдениет және туризм салаларын өзара дамытудағы және ортақ тарихи мұраларды сақтап насихаттаудағы өзектілігін баса айтты. Сонымен қатар, ҚР Мемлекеттік орталық музейінің директоры Рашида Харипова форум қатысушыларына алғыс айта отырып, түркі халықтарының ортақ тарихына, мәдени және тілдік бірегейлікке, сондай-ақ ғылыми және мәдени өзара іс-қимылды дамытудың барлық салаларындағы ынтымақтастық перспективаларына қатысты мәселелер қарастырылған форум көп ұзамай өз нәтижесін беретініне сенім білдірді.

«ҰЛЫ ДАЛАНЫҢ ҰЛТТЫҚ ДӘСТҮРЛЕРІ» II халықаралық ғылыми форумы аясында Түркі өркениетінің тарихи-мәдени және рухани мұрасын жаңғырту ісіне, түркі халықтарының бірлігіне, сондай-ақ түркі мәдениетін насихаттауға және ілгерілетуге қосқан елеулі үлестері үшін ҚР Мемлекеттік орталық музейінің ғылыми жұмыстар жөніндегі директор орынбасары, философия докторы Ғалия Теміртон және WFTGA халықаралық тренері, Мәдениет пен туризм саласының еңбек сіңірген қызметкері Бақыт Камалқызы ТҮРКСОЙ Халықаралық ұйымының медалімен марапатталды. Марапатты ТҮРКСОЙ Халықаралық ұйымының бас хатшысы Сұлтан Раевтың атынан Халықаралық ұйымының Түркітілдес қауымдастықтармен байланыс бөлімінің меңгерушісі, ТҮРКСОЙ музейлер қауымдастығының бас үйлестірушісі Мовсюмлю Джавид Эльшад оглу табыстады.

Сондай-ақ форум аясында отандық мәдениет саласын, соның ішінде музей ісін дамытуға үлес қосқан Қазақстан Республикасы Мемлекеттік орталық музейі, Нұрғиса Тілендиев мемориалдық музейі  және «Алматы қаласы музейлер бірлестігінің» бірқатар қызметкерлері Мәдениет және ақпарат министрлігі Мәдениет Комитетінің алғыс хаттарымен марапатталды.

Форум негізгі пленарлық мәжілісінде Анкара университетінің тіл, тарих және география факультетінің профессоры Абдуллах Гондугду (Түркия) «Түркі халықтары мен Түркиядағы наурыз мерекесі», И. Арабаев атындағы Қырғыз университетінің профессоры, тарих ғылымдарының докторы Сынара Алымкулова (Қырғызстан) «Обычай укладывания в колыбель у кыргызов», Ресей этнографиялық музейінің Кавказ, Орта Азия және Қазақстан этнографиясы бөлімінің меңгерушісі Лариса Попова (Ресей) «Первая весенняя перекочевка как обряд новогоднего цикла кочевников центральной Азии», Қазақстан Республикасы Мемлекеттік орталық музейінің этнография бөлімінің бас ғылыми қызметкері, филология ғылымдарының докторы, профессор, Рүстембек Шойбеков «Наурыз және дәстүрлі мерекелердің тәрбиелік мәні» тақырыбында баяндама жасады.

Сонымен қатар, форум аясында Қазақстан орталық музейінде «Замануи экспозиция музейдің басты байланыстық жүйесі  ретінде» дәрісі (куратор: Ғалия Файзуллина), «Түркі халықтарының тарихи-мәдени мұрасы:  музей қор коллекцияларын қалыптастырудағы құндылық негіздері (ғылыми-практикалық аспектілері)» (куратор: Ғалия Темиртон) және Ықылас атындағы халық аспаптар музейінде «Экскурсия музейдің мәдени-білім беру қызметінің негізгі формасы ретінде» (Куратор, Бақыт Оразымбетова) атты екі күндік музейлік тәжірибе алмасу/ғылыми вебинарлары өтті.

150-ден астам адам қатысқан форум жұмысы нәтижесінде музей қызметкерлерінің біліктілігін арттыру нысаны ретінде музейлік тәжірибемен алмасуға ерекше назар аударылып, болашақта музейлік ғылыми-зерттеу және мәдени-білім бағыттарын дамытудың алғышарттары бекітілді. Сондай-ақ форумға қатысқан ғылыми мекеме және музей қызметкерлеріне, түркі әлемінің тарихын, мәдениеті мен өнерін зерттеумен айналысатын жас ғалымдарға Халықаралық ТҮРКСОЙ ұйымының сертификаттары табысталды.