20.11.2024 ж. Болат Мұхамедиевтің «Уақыт резонансы» атты жеке көрмесі
2024 жылдың 20 қарашасында сағат 16:00-де Қазақстан Республикасы Мемлекеттік орталық музейінде ҚР Қоғам қайраткері, Қазақстанның Өнер академиясының және «MONDIAL ART ACADEMIA» Дүниежүзілік өнер академиясының академигі Болат Мұхамедиевтің «Уақыт резонансы» атты жеке көрмесінің ашылуы өтеді.
Болат Мұхамедиев — Қазақстанның көрнекті суретшілерінің бірі, оның шығармашылығы 50 жылдан астам уақытты қамтиды және кітап графикасы, кескіндеме, абстракция, архитектура, мүсін, дизайн және фотографияның ерекше үйлесімін көрсетеді. 1957 жылы 12 наурызда Қарағанды облысында дүниеге келген ол Алматы көркем училищесінде және Львов кітап өнері академиясында білім алып, кейіннен Мәскеу полиграфия институты мен Дрезден өндірістік графика университетін тәмамдаған.
Ол көптеген халықаралық марапаттарға ие, олардың ішінде 2023 жылы Парижде өткен абстракционисттер арасындағы дүниежүзілік байқауда жеңіп алған алтын медаль ерекше орын алады. Сонымен қатар, ол 12 елдің құрметті суретшісі мәртебесіне ие. Оның есімі 1945-1991 жылдар аралығындағы балалар кітабы суретшілерінің дүниежүзілік энциклопедиясына енгізілген, ал жетістіктері америкалық «Forbes» басылымында жарияланған.
1982-1991 жылдар аралығында Б. Мұхамедиев Германия, Болгария, Чехословакия, Польша, Түркия және Жапония елдерінде кітап-журнал өнері саласында 6 халықаралық сыйлыққа ие болды. 1992-2023 жылдар аралығында ол 11 тақырыптық стела мен 50-ден астам шағын архитектуралық формаларды жасап, бес архитектуралық жобаны әзірлеген. «Білім және еңбек» журналында жұмыс істеген жылдары суретші 24 мұқабаны иллюстрациялап, «Қазақстан» баспасында әртүрлі жанрдағы 300-ден астам кітапты көркемдеген, олардың ішінде көркем, балаларға арналған, ғылыми-көпшілік және ауылшаруашылық әдебиеттері бар. Оның кітаптары Мәскеу және Дрезден көрмелерінде бірінші және екінші дәрежелі дипломдармен марапатталған.
1995 жылдан бастап Болат Мұхамедиев графикалық жұмыстар мен дизайн жасау үшін цифрлық технологияларды белсенді қолдануда, бұл оған жарнамалық өнімдер, архитектуралық жобалар, көрме экспозициялары және анимациялық роликтер дайындауға мүмкіндік берді.
Қазақстанда алғаш рет ол «Painter» бағдарламасында графикалық планшетте орындалған жұмыстарын ұсынады. Бұл бағдарлама оған күрделі композициялар жасауға мүмкіндік береді. Әрбір цифрлық картинаны жасауға 5-тен 10 күнге дейін уақыт кетеді және мұндағы әрбір штрих дәстүрлі кескіндемедегідей нақтыланған.
Суретші сондай-ақ бірқатар маңызды монументтік және стелалық жобаларды жүзеге асырды. Олардың қатарында Қарағанды қ. ғарышкер Тоқтар Әубәкіровтің 70 жылдығына арналған «Дала кеңістігінен ғарышқа» ескерткіші, Егіндібұлақ ауылындағы Қазыбек бидің 350 жылдығына арналған «Тектілер шежіресі», Астанадағы «Green Quarter» тұрғын үй кешені үшін стела, Петропавл облысындағы Новоникольск-Зенченко ауылында «Алтын масақ» стеласы, Алматы қаласындағы «Nauryzbai audany» стела-бағдар көрсеткіші, Мерсин қаласындағы Түркия Республикасының 100 жылдығына арналған монумент, Ұлытау ауылындағы «Ротонда» аркасы және Қазақстан мен шетелдерде арнайы жасаған көптеген басқа да ескерткіштері бар.
Сонымен қатар, Болат Мұхамедиев инклюзия саласына елеулі үлес қосты. Ол Қазақстанда мүмкіндігі шектеулі жандарды тасымалдауға арналған көтергіш құрылғыларды алғаш әзірлеп, олар ЕАЭО халықаралық сертификатын алып, кең қолданыс тапты. Бұл жоба оның шеберлігін ғана емес, адамдардың өмір сүру сапасын технологиялық жаңашылдықтар арқылы жақсартуға деген ұмтылысын көрсетеді.
Көрмеде ұсынылатын цифрлық кескіндеме – суретшінің өнерге заманауи технологияларды енгізуге деген ұмтылысын білдіреді және Қазақстанның жас суретшілеріне маңызды бағдар болуы мүмкін. Экспозиция көрермендерді шығармашылықтың жаңа мүмкіндіктерін ашуға шабыттандырып, XXI ғасыр өнерінде цифрлық технологиялардың бірегейлігін айқындауға және әрбір адамға шебердің туындыларынан «Уақыт резонансын» табуға мүмкіндік беруді көздейді.
Қазақстан Республикасы Мемлекеттік орталық музейі баршаңызды Болат Мұхамедиевтің ерекше өнер туындыларынан ләззат алуға және оның шығармашылық көрегендігінен шабыт алуға шақырады.
Көрмеде автордың 50 жуық цифрлық кескіндеме және графикадағы шығармалары ұсынылады.
