17.05.2024 ж. «Шебер мен қылқалам» көрмесі ашылады

Қазақстан Республикасы Мемлекеттік Орталық музейіндегі Халықаралық музейлер күні кәсіби мерекесі қарсаңында өтетін дәстүрлі «Музей түні» іс-шарасы аясында 2024 жылы 17 мамыр күні қазақтың көрнекті суретшілері Ә.Қастеевтің 120 жылдығы, Қ.Хожықовтың 110 жылдығы, Н.Нұрмұхамедовтің, Ү.Әжиевтің 100 жылдығы және Г.Исмаилованың 95 жылдығына арналған «Шебер мен қылқалам» көрмесі ашылады.

Көрменің мақсаты: Қазақстан бейнелеу өнері мектебінің қалыптасуының бастауында тұрған және ұлттық өнердің әр саласының дамуына өлшеусіз үлес қосқан суретшілердің шығармашылық мұрасын насихаттау.

Қазақ КСР-нің халық суретшісі, қазақ бейнелеу өнерінің негізін салушы Әбілхан Қастеевтің есімі Қазақстанның мәдениеті мен өнерінің дамуында ерекше орын алады. Ол өмір бойы өзінің көп қырлы дарынын сүйікті ісі – кескіндемеге арнап, артына мол шығармашылық мұра қалдырды. Шебердің музей қорынан алғаш рет ұсынылып отырған акварель жұмыстары көрмеге келушілердің үлкен қызығушылғын тудырады. Оның басым бөлігі кең жанрлық сипатымен және маңызды этнографиялық материалдарды қамтитын тақырыптық диапазонмен ерекшеленеді. Ә.Қастеев жұмыстарының көпшілігі 1947 – 1949 жылдары Қазақстан Мемлекеттік Орталық музейінің директоры А.М. Жиреншиннің жетекшілігімен ұйымдастырылған тарихи-этнографиялық экспедициялар кезінде салынған. Оған Ә.Қастеев фотограф және суретші ретінде қатысқан болатын. Қазақстанның түрлі аймақтарына жасалған экспедициялар кезінде сызған эскиздері кейін суретшінің картиналары мен акварель жұмыстарының тақырыптарына негіз болды.

ХХ ғасырдың басында қазақ ауылында туып-өскен Ә.Қастеев қазақтың әдет-ғұрып, салт-дәстүрінің білгірі болғаны сөзсіз және де белгілі этнограф, профессор В.В.Пименовтың пікірінше, Ә.Қастеев өзінің этникалық танымымен «этнофор» критерийлеріне толық сәйкес келетін адам болған. Ә.Қастеевтің акварельдері өзінің деректік сипатымен қоса ерекше тартымдылығымен көрерменді баурап алып, оларға зор эмоциялық әсер береді.

Көрмеде сонымен қатар бейнелеу өнерінің түрлі жанрларын дамытқан өзге де мерейлі-суретшілердің, мысалы, қазақ реализмі мен импрессионизмінің дамуын өз шығармашылығымен айқындаған Нагим-Бек Нұрмұхамедов; көркем графика эволюциясына елеулі үлес қосқан Құлахмет Ходжиков; акварель бояуының теңдесі жоқ шебері – Үкі Әжиев; Қазақстандағы әйгілі қойылымдарға арналған декорациялар мен костюмдердің ерекше эскиздерінің авторы Гүлфайруз Исмаиловалардың жұмыстары ұсынылады. Олардың әрқайсысы ерекше дара қасиеттерімен көрінетін өз алдына бөлек шығармашылық әлемі.

«Шебер мен қылқалам» көрмесі қазақ шеберлерінің көркем өнері мен шығармашылығы әлеміне дендеп енуге мүмкіндік береді. Көрмеде олардың шығармашылық және қоғамдық қызметі фотоқұжаттық материалдарымен (фотосуреттер, дипломдар, сертификаттар және т.б.) толықтырылған.

Байланыс телефондары: 8 (727) 264 09 66, 264 55 77, 264 46 50, 264 26 80

29.04.2024 ж. «КӨНЕНІҢ КӨЗІ - САНДЫҚ» cандықтар коллекциясының көрмесі

2024 жылдың 29-сәуірі күні Қазақстан Республикасы Мемлекеттік Орталық музейінде музей қорындағы сандықтар коллекциясы негізінде «КӨНЕНІҢ КӨЗІ - САНДЫҚ» көрмесі ашылады.

ҚР Мемлекеттік орталық музейі қорында дәстүрлі қазақ мәдениеті мен этнографиясына қатысты бай коллекция сақтаулы. Олардың ішінде сандықтың ерекше түрлері бар.

Сандық – халық тұрмысында ерте кезден пайдаланылып келе жатқан ең ежелгі жиһаздың бірі. Заман ағымына сай дәстүрлі ортада қолданылған көптеген үй жиһаздары бүгінде қолданыстан шығып, өзінің әуелгі функциясы ұмытыла бастағанмен, сандықтар әлі күнге дейін ұзатылған қызға жасалатын жасаудың бірі ретінде өз мәнін жоғалтпай келеді. Үйдің төрінен орын алатын сандықтардың үстіне жүк жиналады. Сондай-ақ, оның ішіне бағалы дүниелер (асыл бұйымдар, қымбат маталар, киімдер), тәттілер, тіпті ғұрыптық мәні бар заттар: қырқынан шыққанда алынып, шүберекке оралған баланың қарын шашынан бастап, ұзатылып келген қыздың сәукелесі, адам қайтыс болғанда оралатын кебініне дейін сақталған. Сондықтан сандықтардың атқаратын рөлі үлкен болған.

Жасалу материалына, көлемі мен атқаратын қызметіне қарай сандықтар: жағлан, кебеже, абажа, абдыра, ақырет сандық, шай сандық, ағаш сандық, сүйектелген сандық, оймышты сандық деп бөлінеді.

Көрмеге Орталық музей қорында сақтаулы сандықтардың - кебеже, абажа, абдыра, шай сандық, ағаш сандық, сүйектелген сандық және т.б. түрлері қойылады, олардың әрқайсысының жасалуы мен тұтынылуына қарай өз ерекшелігі бар.

02.05.2024 ж. «Қуаныштың көк түсі» көркем шығармалар көрмесін ашады

Қазақстан Республикасының Мемлекеттік орталық музейі «Қуаныштың көк түсі» көркем шығармалар көрмесінің ашылу салтанатын өткізді.

Көк - әдетте аспан түсі. Бұл түс - жердегі тіршілікпен тығыз байланысты. Әркімнің көк түсті қабылдауы әртүрлі. Осы түске ену арқылы тыныштық, тазалық, шынайылық  сезімдерін бастан өткереміз.

 «Яблоневая палитра» Кәсіби суретшілер қауымдастығы осыған дейін де «ақ», «жасыл», «қызыл» тақырыптарында эксперименттік көрмелер өткізді. Ал бұл Қазақстан халқының жан тазалығы туралы символдық көрме.

Суретшілердің туындыларында Қазақстанның бейбіт көк аспаны, көгілдір таулары мен мөлдір суы бейнеленген. Мемлекеттік геральдикада ел туының түсі көк болуы кездейсоқтық емес. Көк түс – шексіздіктің және мәңгіліктің белгісі.

Сондай-ақ көрмеде экологиялық тақырып қозғалды. Қазақстанның ауасын, өзендер мен көлдерді, дала мен тау гүлдерін қорғау бүгінде өте өзекті. Суретшілердің бұл таңғажайып түстерді осы көрмеге қойылатын шығармашылық жұмыстары арқылы көрсетуі көпшілікті қызықтырары сөзсіз.

«Қуаныштың көк түсі» көрмесіне «Яблоневая палитра» қауымдастығының отыздан астам кәсіби суретшілері қатысты.

Олардың құрамында ҚР Суретшілер одағының мүшелері, Қазақстан өнер қайраткерлері, ҚР Өнер Академиясының мүшелері, «Яблоневая Палитра» Кәсіби суретшілер қауымдастығының белсенді қатысушылары: Ақанаев Бейсебек, Марлан Нысанбаев, Лидия Дроздова, Игорь Гущин, Георгий Макаров, Есназарова Перизат, Мақсат Қаңтарбаев, Фурса Елена, Ророкин Александр, Кәрімов Ильдар, Ақанаева Ботагөз, Ли Георгий, Саванкина Лариса, Киянова Ирина, Самаркин Юрий, Попова Елена, Латын Андрей, Сағымбаев Жұмағазы, Абжанова Анара, Ведерников Максим және басқа да қылқалам шеберлері бар.

Шарада М.Серкебаевтың жетекшілігіндегі Алматы қаласы әкімдігінің концерттік оркестрі өнер көрсетті. 

26.04.2024 ж. Баймбетова Құрманкүл суретші-ұстаздың жеке көрмесі

Қазақстан Республикасының Мемлекеттік Орталық музейі 2024 жылғы 26 сәуірде сағат 16.00-де суретші-педагог, ҚР Еуразиялық Суретшілер және этно-Дизайнерлер одағының мүшесі Баймбетова Құрманкүлдің 60 жылдығына арналған " Менің өнердегі  ұстаздық жолым" жеке көрмесін ашады.

Баймбетова Құрманкүл Сейтжапарқызының педагогикалық өтілі 30 жыл. Ол ҚР суретшілері мен этно-дизайнерлері Еуразиялық одағының мүшесі. Республикалық, қалалық және халықаралық көрмелер мен конкурстарға белсенді қатысады, олардың арасында — Талдықорған қаласында өткен «Қазақстан Республикасы Тәуелсіздігінің 25 жылдығына арналған «Ұрпаққа аманат» халықаралық көрмесіне қатысып, I дәрежелі дипломмен марапатталды. Балалар шығармашылығының XIV Халықаралық «Менің қаламдағы күз» байқауы; КазБСҚА жанындағы Қазақстан бас сәулет-құрылыс академиясының «Наурыздың көктемгі бояулары» байқауы;  IV халықаралық суреттер, костюмдер, «Шығармашылық еркіндігі» қолөнер байқауы; Әбу Насыр Әл-Фарабидің 1150 жылдығына арналған «Бабалар аманаты», «Көп ғасырлық толқулар» республикалық қойылымдары; XXI халықаралық онлайн- «1 Мамыр - достық мерекесі» байқауы; «ХХІ ғасыр көшбасшысы», «Күзгі бал» халықаралық шығармашылық байқауы, «Ұлы дала ұрпақтары» фестивалі; «Алматы БалаFEST» қалалық балалар фестивалі аясында «Бояулар құпиясы»,«Өнерлі бала» (2022-2023 жж.), Т.Жүргеновтың 125 жылдығына, Абай атындағы ҚазҰПУ-дың 95 жылдығына арналған «Суретшілер әлемі» байқауы. «Шығыс шеберлері» халықаралық симпозиумы және т. б.

Баймбетова Құрманкүл педагог ретінде көптеген мақалалардың және әдістемелік әзірлемелер, оқыту білім беру бағдарламаларының авторы. Суретшінің шығармашылығы мен педагогикалық қызметі туралы мақалалары әртүрлі басылымдарда, каталогтарда, кітаптарда, сайттарда, материалдар жинақтарында  орналастырылған. Мұғалімдерге арналған «БАБАЛАР АМАНАТЫ» халықаралық сайтында «Заманауи педагог", «Педагогтың шығармашылығы» және «Мәңгілік ел ұстаздары» (Мұғалім шығармашылығы) оқытудың жаңа стандарттары туралы мақалалары жарияланған.

Сондай-ақ, оның жұмыстары қазақстандық суретшілердің өнер туындыларының каталогтарына енгізілген. Арнайы ғылыми-әдістемелік шығарылымы  «Соңғы онжылдықтағы Қазақстан педагогтерінің үздік мақалалары» (2023 ж.). 2022 жылы Стамбул қаласында педагогтарды оқытудың «Креативті және инновациялық әдістері" атты халықаралық тағылымдамадан өтті.

"Менің өнердегі ұстаздық жолым" көрмесі суретшінің соңғы жылдардағы еңбектері мен шығармашылығын қамтиды. Көрмеде әр түрлі техникада орындалған 35-ке жуық жұмыс ұсынылады: боялған қораптар, пейзаж, натюрморт, портрет сияқты жанрлардағы кескіндеме жұмыстары.

Көрме 2024 жылдың 11 мамырына дейін жалғасады.