ҚР Мемлекеттік орталық музейінің мәдени-білім жұмыстарының жаңа түрлері

ҚР Мемлекеттік орталық музейі мектеп оқушыларын музей әлемі және музей коллекцияларымен, еліміздің тарихы және мәдениетімен таныстыруға бағытталған, тәрбиелік біліми мәні бар және ойын түрінде   экспозициялық залдар бойынша өткізілетін балаларға арналған мәдени-білім жұмысының жаңа түрлерін дайындады. Түрлі тарихи тұлғалар мен аниматорлардың қатысуымен өтетін "action" жанрдағы театрландырылған кешенді біліми бағдарламалар, танымдық тақырыптық экскурсиялар мен музейлік сабақтар. Квест түріндегі музей ойындарының маңызды элементтерінің бірі берілген бағыт бойынша музей залдарына саяхат, өзіндік зерттеу жұмыстары түріндегі бірқатар логикалық тапсырмалар орындау болып табылады. Ойын барысында ойыншы өз білімін, шапшаңдығын және тапқырлығын көрсете білуі қажет.

ҚР Мемлекеттік орталық музейі 2019 жылы төмендегідей бірнеше интерактивті білім бағдарламаларын ұйымдастыруды жоспарлап отыр:

• «Қазақстандағы табиғат әлемі. Қызыл Кітап»;
• «Қазақ халқының мәдениеті мен тұрмысы»;
• «Палеонтология және археология әлеміне саяхат»;
• «Суретші Н.Хлудов туындыларындағы дәстүрлі қазақ мәдениеті»;
• «Әжемнің сандығындағы құпиялар»;
• «Қазақ ертегілеріне саяхат».