2023 жылдың 8 тамызы күні Қазақстан Республикасының Мемлекеттік орталық музейінде «ЕУРАЗИЯ КӨШПЕНДІЛЕРІНІҢ МӘДЕНИЕТІ: ДӘУІРЛЕР, ЕСІМДЕР, ОҚИҒАЛАР» тақырыбында ғылыми отырыс өтті. Шара ҚР Мемлекеттік орталық музейі мен Венгрия Республикасының Ұлттық музейінің өзара ғылыми және мәдени ынтымақтастығының аясында ұйымдастырылды.

Іс-шараның мақсаты: Қазақстан мен Венгрия музейлері арасындағы ғылыми-мәдени байланыс ауқымын кеңейту, тәжірибе және пікір алмасу.

Шараға Венгрия Ұлттық музейінің Бас директоры Л. Шимон Ласло, бас директордың орынбасары Габор Вирагош, археолог, аудармашы Вера Ухри Майерек және Қазақстанның музей мамандары мен археолог-ғалымдары қатысты.

Қазақстан Республикасы Мемлекеттік орталық музейінде Астана күніне орай «Еңсесі биік – Елорда» мерекелік іс-шара өтті.

6-шілде — біздің еліміздегі елеулі күндердің бiрi. Бұл — әсем Астананың туған күні. Астана  — халқымыз үшін тәуелсіздік пен өсіп-өркендеудің  алтын тұғыры. Бүгін біз осындай қасиетті сөздерді құрметпен, бойымызға біткен ұлтшылдық сезіммен көкірегімізді керіп, басымызды көтеріп, аса мақтанышпен айта аламыз. Себебі, Арқаның төрінде сылдырап аққан Ерке Есілдің жағалауында орналасқан айбынды Астанамызды бүгінде әлем таниды.

Астана – Қазақ елі болашағының қаласы. Мәдениеттің ошағы, ғылым мен білімнің ордасы. Еліміздің көгілдір туы желбіреген тәуелсіздігіміздің ордасы. Жаңа Астанамыздың құрылысы - мемлекетіміздің жасампаздықка ұмтылуы деп білеміз.

Мерекелік іс-шарада 5571 әскери бөлімінің әскери оркестрі, және эстрада әншілері Руслан Нұрғали, Қуандық Үсен, «Берен» тобы, Кемербаева Айсулу, Кемербаева Айнур сынды өнерпаздар өнер көрсетті.

Кеш соңында қонақтар қошеметтерін аямай ерекше көңілмен алғыстарын айтып тарқасты...

2023 жылдың 14 шілде күні Қазақстан Республикасының Мемлекеттік орталық музейінде (Алматы қ.) диабетология саласындағы жетекші мамандар ұйымдастырған іс-шара өтеді. Ресей мен Қазақстанның медицина саласындағы дәрігерлері, зерттеушілері мен сарапшылары диабетикалық табан синдромын емдеуге арналған инновациялық конференцияға жиналады. Конференция қант диабетінің осы ауыр асқынуын емдеудегі соңғы тенденциялар мен жетістіктерді талқылау үшін жетекші сарапшыларды біріктіреді.

Диабетикалық табан синдромы – бұл қант диабетімен ауыратын науқастарда дамитын созылмалы асқыну. 2022 жылғы шілде айының статистикалық есебіне жүгінсек, Қазақстанда ресми түрде қант диабетімен ауыратын 440 000 – ға жуық пациент бар, оның ішінде 66 000-ға жуық адамда осындай асқынған-диабетикалық табан синдромы бар. Бұл өте қатерлі ауру, яғни аяқтарда түрлі жаралар пайда болады, көбінесе инфекция таралуымен қиындай түсіп, уақтылы емделмеген жағдайда аяқ-қолдың ампутациясына дейін әкелуі мүмкін. Қант диабетінің асқынуларының ерекше категориясы – бұл аяқтағы кішкентай буындардың зақымдануы, оны Шарко аяғы деп атайды. Егер дұрыс емделмесе, мұндай аяқ «Сүйек дорбасына» айналады және, өкінішке орай, мұндай аяқтар ауыр әрекеттерге жарамай, жиі ампултацияланып жатады. Соңғы жылдары бүкіл әлемде диабетикалық табан жағдайлары едәуір өсті, бұл барлық елдерде тиімді емдеу мен алдын-алуды қажет ететін ауру түріне айналып отыр.

Конференцияның басты мақсаты – диабетикалық табан ауруын емдеудің инновациялық әдістері мен тәсілдерін ұсыну, дәрігерлер мен зерттеушілер арасында тәжірибе алмасу болып табылады. Конференцияға қатысушылар асқынулардың алдын алуға және пациенттердің өмір сүру сапасын жақсартуға көмектесетін соңғы ғылыми зерттеулерді, клиникалық сынақтарды және технологиялық әзірлемелерді талқылауға мүмкіндік алады.

Конференцияға диабетология, хирургия және травматология саласының жетекші мамандары қатысады. Олар өз білімдері мен жинаған тәжірибелерімен бөлісіп, емдеудің соңғы әдістерін ұсынады және диабетикалық табан аурынының алдын алу бойынша ұсыныстар береді. Конференцияның негізгі баяндамашыларының бірі – диабетикалық табан саласындағы жетістіктерімен көзге түскен профессор Бреговский Вадим Борисович. Ол осындай науқастарды емдеудегі өз тәжірибесімен бөліседі және қант диабетімен ауыратын науқастардағы жараларды емдеудің әлемдік пункцияларының соңғы деректерін көрсетеді. Сондай-ақ, хирургиялық емдеудің инновациялық технологиялары және Шарко аяғындағы деформацияны қалпына келтірудің соңғы әдістері, соның ішінде жасанды биоматериалдарды қолдану ұсынылады.

Аталмыш конференцияда панельдік пікірталас қамтылады, яғни онда қатысушылар диабетикалық табан ауруына қатысты өзекті мәселелер мен қиындықтарды талқылай алады. Сондай-ақ, өз тәжірибелерімен бөлісіп, емдеу процесін жақсарту үшін жаңа идеяларды да ұсына алады.

Конференцияны ұйымдастырушылар дәрігерлерді (хирургтар, травматологтар, эндокринологтар), зерттеушілерді және басқа да мүдделі тұлғаларды осы маңызды іс-шараға қатысуға шақырады. Конференция білім мен тәжірибе алмасуға, сондай-ақ диабетикалық табан ауруын емдеу саласындағы жетекші сарапшылармен байланыс орнатуға бірегей мүмкіндік береді. Конференция туралы қосымша ақпарат, соның ішінде іс-шараның ресми сайтында өткізілетін бағдарламамен танысып, тіркелуге болады. [сілтеме]. Тіркеу 2023 жылдың 12 шілдесіне дейін жалғасады.

Өтетін орны: ҚР Мемлекеттік орталық музейі, Самал-1, 44 үй.

Күні: 14 шілде 2023 жыл.

Уақыты: 14: 00 – 20: 00

«МУЗЕЙ ТҮНІ - 2023» акциясына 15 мыңнан  астам адам жиналды 

Қазақстан Республикасының Мемлекеттік орталық музейі 2006 жылы «Халықаралық музейлер күні» кәсіби мерекесіне арналған «МУЗЕЙ ТҮНІ» халықаралық акциясын өткізген еліміздің алғашқы музейі. 

«МУЗЕЙ ТҮНІ» халықаралық акциясы – қала тұрғындары мен қонақтарына музей жәдігерлерімен танысуға, мәдени-танымдық бағдарламалар арқылы тарихтың жаңа парағын ашуға мүмкіндік беретін рухани-ағартушылық жоба.

ҚР Мемлекеттік орталық музейінде 2023 жылдың 18 мамыры күні, сағат 18.00- 00.00 аралығында «Музейдің тұрақтылығы мен өркендеуі» ұранымен дәстүрлі «МУЗЕЙ ТҮНІ-2023» акциясы 18-ші рет өткізілді. «МУЗЕЙ ТҮНІ-2023» акциясы музейлер қорындағы тарихи-мәдени мұраны сақтаудағы музей қызметкерлерінің еңбегін қолдап және ұлттың игілігін құрайтын құндылықтарды кеңінен насихаттауды көздейді.

ҚР Мемлекеттік орталық музейі 18 мамыр Халықаралық музейлер күніне орай ұйымдастырған «Музей түні» шарасы  жылдағы дәстүр бойынша қазақ өнерінің корифейі, мэтр, Қазақстанның Халық әртісі Нұрғали Нүсіпжанұлының ән шашуымен басталды. Сондай-ақ  тіл жанашыры Асылы Осман, қоғам қайраткері Мэлс Елеусізов салтанатты жиынның құрметті қонақтары болды. 

Кеш қонақтарын айтулы мерекемен құттықтаған ҚР Мемлекеттік орталық музейінің директоры Рашида Ерімқызы: «Музей – тарих пен мәдениеттің маңызды нысаны. Ал ата-бабамыздың жүріп өткен жолы еліміздің бай тарихын құрайды. Сондықтан бұл мереке бәрімізге ортақ» деді. Шара барысында бірнеше музей қызметкері марапатталып,  «Жыл үздігі» номинациясының иегерлері атанды. 

Музей түніне мемлекеттік оркестрлер мен музыкалық шығармашылық топтар: «Tengri Group» тобының мүшесі Әсем Көпбаева, Халықаралық байқаулардың лауреаты, опера әншісі З.Алтынбаева, Халықаралық байқаулардың қатысушысы, әнші, актер Тимур Иманжановтар, «IL CANTO» вокалдық тобы, Құрманғазы атындағы Қазақ Ұлттық консерваториясының студенттерінен құралған «Жас Мұқасан» вокалдық ансамблі, Абай атындағы опера және балет театрының солистері Олег Татамиров, Төлеген Рахымбаев, ҚР Халық әртісі М.Серкебаевтың басқаруындағы Алматы қаласы Әкімдігінің концерттік оркестрі, М. Төлебаев атындағы музыка мектебінің оқушылары, «Берен» вокалдық тобы, «Шабыт» және «Кербез» би ансамблдері, «Нәзік» жетігеншілер ансамблі, Бауыржан Тәңірберген, Олжас Шерхан, Қуандық Үсен, Руслан Нұрғали, Гауһар Жұмағұлова және т.б өнер жұлдыздары қатысып, көрерменнің ыстық ықыласына бөленді. Сондай-ақ Алматы циркінің және Алматы қаласы білім басқармасы, қалалық дене шынықтыру және спорт оқу-тәжірибелік орталығының  әртістері өз өнерлерін паш етті. 

       Шара барысында «Музей түні-2023» акциясының ақпараттық серіктесі – CITIX компаниясының PR-директоры – Леонид Нығматуллин, сондай-ақ көркемдік пленэрдің демеушісі – Бас директор Чен Чжицзе бастаған «Kazakhstan Arsha International Cultural Cooperayion LTD» компаниялары да өз ықыластарын білдірді.

ҚР Суретшілер одағының мүшесі, «Зерлеу» техникасымен эксклюзивті алтын тігу авторлық үйінің  негізін қалаған  Айжан Әбдубаитованың этноколлекциясы да көпшілік назарына ұсынылды. «Музей түні» акциясының аясында бірнеше көрме ашылып, музейдің барлық залында экскурциялар ұйымдастырылып, шеберлік сабақтары өтті. Мәдени іс-шара барысында Орталық музей қоры және жеке коллекциялар негізінде ұйымдастырылған бірнеше жаңа көрме ашылды. 

«Ер жігіттің бес қаруы бойында...» көрмесі арқылы музей қонақтары ҚР Мемлекеттік орталық музейінің ерекше қару-жарақ коллекциясымен таныса алады.  Көрмеде қазба жұмыстары барысында табылған археологиялық экспедиция материалдары: найза ұштары, сүңгі, жебелер, қола қылыштар, қанжарлар мен пышақтар, сондай-ақ қазақ ұлттық қарулары – садақ, жебе, қорамсақ, қын, қылыш, қанжар, пышақ, найза, айбалта, сойыл, шоқпар, қорғанысқа арналған жарақтар – дулыға, қалқан, шарайна, кісе белдіктер және 1916 жылғы ұлт-азаттық көтерілісі, Екінші дүниежүзілік соғыстары кезінде қолданған қару түрлері де көпшілік назарына ұсынылды.

ҚР Суретшілер одағының мүшесі, сәулетші, суретші, Тамара Волкованың «Көне жәдігерлердің өмірі мен символикасы» атты көрмесінде қылқалам шеберінің 80-нен астам туындылары, сонымен қатар, еліміздің белгілі тұлғалары мен кәсіби суретшілерінің «XXI ғасыр көшбасшылары мен танымал тұлғалары. Бірлескен шығармашылық»  шығармашылық жобасы негізінде туындаған картиналары ұсынылды. Тұңғыш рет ұйымдастырылып отырған аталмыш жоба 100-ге жуық елімізге еңбегі сіңген танымал тұлғалар – Асанәлі Әшімов, Олжас Сүлейменов, Нұрғали Нүсіпжанов, Роза Рымбаева, Бибігүл Төлегенова, Мақпал Жүнісова және т.б. өнер және қоғам қайракерлерінің қатысуымен жүзеге асырылған болатын.

«Музей түні» акциясының аясында  «Ұлттық мұра – ұрпаққа аманат» атты арт-пленэр ұйымдастырылып, Қазақстанның 15 танымал суретшісі өз туындыларының тұсауын кесті. Қылқалам шеберлері Халықаралық музей күні кәсіби мерекесіне орай  Орталық музейге жаңа жұмыстарын сыйға тартып, музейдің кескіндеме қорын толықтырды. Арт-пленэрдің демеушісі – «Чжунсиньговень» үкіметтік емес ұйымы және 2016 жылы Алматы қаласында құрылып, Қытай мен Қазақстан арасындағы ынтымақтастықтың артуына дәнекер болған «Бүгінгі Жібек жолы» басылымы.  

«Үш діннің бірегей жазба үлгілері: Тәурат, Інжіл, Құран» – «Үш зат-үш тарих» атты көрме аясында музей келушілері ерекше және сирек кездесетін рухани жәдігерлер негізінде, яғни, бұзау терісіне жазылған Тәурат (XIV-XV ғғ.), 1751 ж. жарық көрген Інжіл және Түркияда жазылған Құран (XVIII-XIX ғғ.) сияқты құндылықтармен танысты. 

Музей түні шарасы аясында басқа да, атап айтқанда заманауи технологияларды қолданатын сәндік-қолданбалы өнер және дәстүрлі қолөнер түрлері бойынша шеберлік сабақтарын «Шеберлер ауылы» қолөнершілері өткізді. Акцияға қатысушылар киіз басу, жүннен сурет жасау, гипстен фигуралар, кескіндеме, қыш, зергерлік бұйымдар, бисер бұйымдары, кесте тігу, балшықтан модельдеу, көркем керамика, кілем тоқу, ағаш өңдеу және металл өңдеу бойынша шеберлік сабақтарына қатысуға мүмкіндік алды. 

Шеберлік сабақтарын Қазақстан және Өзбекстанның белгілі шеберлері, О.Таңсықбаев атындағы Алматы сәндік-қолданбалы өнер колледжінің студенттері мен оқытушылары, Т. Жүргенов атындағы Қазақ ұлттық өнер академиясы жанындағы колледж жас шеберлері, «Salta-Art» арт-студиясы және Алматы Оқушылар сарайының шеберлері өткізді. 

Мерекелік шара барысында «Топжарған» этно-мәдени орталығы аңшылар шеруін ұйымдастырып, қазақ саятшылық кәсібін көпшілікке таныстырса, «Сал-сері» этноспорт федерациясының өкілдері ұлттық «садақ ату» спорт түрін, ал Данияр мен Асылгүл Байдаралы «Бес қару» өнерін паш етті. 

Балаларға арналған Коворкинг орталығында «Жеті қазына», «Қазақ зергерлік бұйымдары», «Ұлы Жібек жолы» тақырыптарында музейлік сабақтары мен мәдени-танымдық іс-шаралар өткізілді. 

Музей қонақтарын сақ патшайымы Томирис пен сақ жауынгері Алтын адам сән-салтанатымен күтіп алды.

Ғасырдан ғасырға жететін ұлттық мұрамызды ұлықтаған кештен Алматылықтар ерекше әсермен тарқасты. Шараға 15 мыңнан астам адам жиналды.