Қазақстан Республикасы Мемлекеттік Орталық музейі 2018 жылдың 18 мамырында сағат 17.00-ден 24.00-ге дейін Халықаралық музейлер күні мерекесіне арналған «Музей түні» атты іс-шарасын өткізеді.
Іс-шараның биылғы жылғы ұраны – «Гиперкоммуникация дәуіріндегі музейлер».
Жыл сайын «Музей түні» акциясы тұрақты және де жаңа демеушілердің қолдауымен өткізіледі. «Музей түні-2018» іс-шарасының Бас демеушісі ретінде «RUSLAN BAIDALINOV PROMOTION GROUP» компаниясы танылып отыр.
«Музей түні» – Орталық музей 2006 жылдан бері жүзеге асырып келе жатқан халықаралық ірі әлеуметтік мәдени-білім беру жобасы. Дәл осы түні Музей түрлі жастағы, түрлі көзқарастағы адамдарды, түрлі ұлттар мен ұлыстарды тоғыстырып қана қоймай, көңіл көкжиегін кеңейтіп, төл мәдениетіміздің нәрінен сусындауға шақырады. Музей түнінің форматы жыл сайын өзгеріп отырады. Бұл жолы алматылықтар мен қала қонақтарына жаңа бағдарлама, оның ішінде музейдің қор коллекциясы негізінде құрылған көрмелер мен Қазақстан суретшілерінің авторлық жұмыстары қойылған көрмелер ұсынылады:
- «Ұлы Жібек жолындағы ортағасырлық қалалар: қыш ыдыстағы ою-өрнектер (музей қорындағы керамикалық материалдар негізінде)» көрмесі Қазақстан аумағындағы қалыпталған және шыңдалған керамикалық бұйымдарды әшекейлеуде пайдаланылған түрлі өрнектер туралы мағлұмат береді.
- «Жаңғырған мұра» көрмесінде музей зертханаларында қайта қалпына келтірілген зергерлік бұйымдар мен дәстүрлі белбеулер қойылады.
- «Адам. Дәуір. Байланыс» көрмесінде ерте петроглифтерден бастап бүгінгі күнге дейінгі заттар мен байланыс құралдары таныстырылады.
- «Руханият ескерткіштері» – үш діннің бірегей жазба ескерткіштерінің үлгілері: Таурат, Інжіл, Құран.
- «Сағым. Пленэр. Ханшайымдар ойыны» көрмесінде суретші Анна Маргацкаяның қолынан шыққан кескіндеме, акварель, керамикалық бұйымдар ұсынылған.
- «Рухани жаңғыру» бағдарламасының бөлігі – бестомдық іргелі «Қазақтың этнографиялық категориялар, ұғымдар мен атауларының дәстүрлі жүйесі» ғылыми-этнографиялық энциклопедиясының толықтырылған екінші басылымының тұсаукесері кештің көркін келтірері хақ.
Күні бойы өтетін ИНТЕРАКТИВТІ ЭКСПОЗИЦИЯЛАР аясында келушілер өткен дәуірлер тарихынан бастап қазіргі жаңашылдықтарға дейінгі мағлұматтарды алып, қызғылықты уақыт өткізеді:
- «Ән атасы – Әміре» әдеби-музыкалық музейлік сабағы көрнекті қазақ әншісі Әміре Қашаубаевтың өмірі мен шығармашылық жолымен таныстырады. Сабақ Абай атындағы Республикалық мектеп-интернаты, «Көкіл» музыкалық мектебі, А.Жұбанов атындағы музыкалық мектептің қатысуымен ІІ экспозициялық залда өтеді.
- «Әжемнің сандығындағы заттардың тарихы» саяхат-ойыны арқылы қазақтардың тұрмыс-тіршілігі таныстырылады. Сұқбат құру, тақырыптық тапсырмаларды орындау және ойын тәсілдерін қолдану арқылы музей көңіл көтеру орны ғана емес, жадыны дамытып, шығармашылық алаңына айналады. Өтетін орны: ІІ экспозициялық зал.
- «Ортағасырлық керамикадағы бейнелі өрнектер: қазіргі көзқарастар» интерактивіне қатысушылар керамикалық бұйым және сәулеттік қаптауыштағы әшекейлеу элементтерін сурет бетіне немесе тұзды қамырдан жасалған бұйымдарға түсіру мүмкіндігіне ие болады. Өтетін орны – I экспозициялық зал;
- «Белгілі заттың белгісіз қырлары» (қазақтардың сирек кездесетін тұрмыстық заттары) және «Жаңылтпақ» қазақ ұлттық ойыны.
- «Әке көрген оқ жонар, шеше көрген тон пішер». Шебер әже мен келіні қазақ халқының салт-дәстүрлері мен мейрамдары, бала тәрбиесі, ұлттық ойындар және басқасын айтып түсіндіреді. Өтетін орны: ІІ экспозициялық зал.
Мереке күні келушілерге І, ІІ, ІІІ, ІV залдар – «Палентология және археология», «Тарихи этнография», «Ұлы Отан соғысы жылдарындағы Қазақстан және Диаспоралар мәдениеті», «Тәуелсіз Қазақстан» залдарына тегін кіріп, экскурсия тыңдау мүмкіндігі беріледі.
Мерекелік кешті белгілі шоумендер – ДАНИЕЛЬ ДЖЕЙМС, ТІЛЕУХАН ОМАРХАН, РУСЛАН БАЙДАЛИНОВ жүргізеді.
ҚР Мемлекеттік орталық музейі баршаңызды 18 мамыр күні сағат 17.00-ден түн жарымына дейін күтеді!
Кіру тегін.
 |
 |
 |
 |
 |
 |
 |
 |
 |
 |
Қазақстан Республикасы Мемлекеттік орталық музейі 2018 жылдың 4 мамыр күні сағат 11.00-ден 13.00-ге дейін Ұлы Отан соғысындағы Жеңістің 73 жылдығына арналған «Халық жүрегіндегі жауынгерлер» атты қайырымдылдық іс-шарасын өткізеді.
Жеңіс күні – жан аямай елін қорғаған ержүрек батырларымызды еске алу мерекесі. Асау уақыт тізгінін ауыздықтай алмайсың – жылдан-жылға адамзаттың басына алапат қасірет түсірген зұлмат соғыс жайлы баяндайтын Ұлы Отан соғысы ардагерлерінің қатары сиреп барады. Ардагерлермен жүздесу өскелең ұрпақтың еліміздің өткен тарихын тереңірек зерделеуіне ықпал етіп, олардың бойында азаматтық сана-сезім, қазақстандық патриотизмді қалыптастыру, Отансүйгіштікке, қашанда ҚР мүдделеріне қызмет етуге лайық болуға тәрбиелеп, ардагерлерге құрмет көрсетіп, алғыс сезімін білдіруге мүмкіндік береді.
Қазақстан Республикасы Мемлекеттік орталық музейі серіктестерімен бірлесе отырып Жеңіс Күні мейрамы қарсаңы – 2018 жылдың 4 мамырында
Алматы қ. Медеу ауданында тұратын Ұлы Отан соғысы және еңбек майданы ардагерлеріне арнап мерекелік бағдарлама дайындады:
- ардагерлерге құрмет көрсетіледі;
-«Қазақстан Ұлы Отан соғысы жылдарында» экспозициясымен танысу;
- ҚР Ұлттық Қауіпсіздік Комитеті Шекара Қызметі Академиясы, Корей мәдени орталығы, «Аяжан» Медецина колледжі өнерпаздарының, Т.Жүргенов атындағы Қазақ Ұлттық Өнер Академиясы артистерінің орындауында концерт;
Сондай-ақ, осы акцияны қолдаған: «Сұлтан-Маркетинг» ЖШС, ZUGO Home Textile, Гавая Аквапаркі, Қазақстан Жылыжайлары Қауымдастығы, «Бостан» компаниясы, «Ақмарал Сауда», «AMIRAN», «WELLDIS», «Lemonadoff Food» жауапкершілігі шектеулі серіктестіктері сынды демеушілеріміздің ардагерлерге ұсынбақ тарту-таралғылары бар.
Қазақстан Республикасы Мемлекеттік орталық музейінде Наурыз мейрамына арналған «Наурыз нақыштары» атты іс-шара өтті.
«Наурыз нақыштары» мейрамы Мемлекеттік орталық музейде жыл сайын өткізілетін дәстүрлі шаралардың біріне айналып отыр және Қазақстан халықтарының мәдени дәстүрлерінің біртұтас нышаны боп саналады. Іс-шара ҚР Мемлекеттік орталық музейі директорының орынбасары Б. Қақабаевтың алғы сөзімен ашылды.
Көрмеде О. Таңсықбаев атындағы Алматы сәндік және қолданбалы өнер колледжі студенттерінің «Қиял», «ҰЛЫ ДАЛА» қазақ ұлттық киімдері ұсынылды.
Ежелгі Наурыз мерекесі бүгінде заманауи нақыштағы ұлттық мейрамға айналды. Қоғамдағы саяси тұрақтылықты, достықты және үйлесімділікті нығайтуда үлкен рөл атқарып келеді. Шығыс халықтарының басым көпшілігі үшін, Наурыз – көктемнің бастауы, табиғаттың жаңаруы, мейірімділіктің, сүйіспеншіліктің белгілі болып табылады. Осы мерекелік күнде музейдің қонақтары үшін ...... суретші Н.Г. Хлудовтың шығармашылығына және «Дәстүрлі қазақ мәдениет әлеміне» арналған интерактивті сабақтар; О. Таңсықбаев атындағы Алматы сәндік-қолданбалы өнер колледжінен ұлттық сән киімдер үлгілері («Қиял» және «Ұлы дала» коллекциялары); музыкалық топтар мен ансамбльдердің қатысуымен болған концерт, Қазақ Ұлттық аграрлық университетінің студенттері, А. Жұбанов ат. ұлттық аспаптар оркестрі мен «Гүл-Бану» би ансамблі, халықаралық және республикалық байқаулардың лауреаттары, Құрманғазы ат. Қазақ ұлттық консерваториясы; Ж. Елебеков ат. Республикалық эстрадалық-цирк колледжі; «Айбын» би ансамблі және т.б.
Көрермен қауым қазақ халқының тұрмыстық бұйымдары орналастырылған 2-ші «Қазақ этнография» залына қызығушылық танытты.
Мәдени шарада 300-ден астам қонақтар болды. Оның 200-і Алматы қ. жалпы білім беру мектептері мен студенттері және оқытушылары құрайды.
 |
 |
 |
 |
ҚР Мемлекеттік орталық музейі әль-Фараби атындағы Қазақ Ұлттық университетінің тарих факультеті және Ш.Ш.Уәлиханов атындағы Тарих және этнология институтымен бірігіп 2018 жылдың 13-14 сәуірі күндері «III-і Арғынбаев оқулары. Қазіргі заман этнография ғылымы және оның қоғамдық жаңғырудағы ролі» атты Халықаралық ғылыми-тәжірибелік конференция өткізеді.
Конференция ҚР Президенті Н.Ә. Назарбаевтың «Болашаққа бағдар: рухани жаңғыру» атты бағдарламалық мақаласы аясында өтеді. Мақалада жария етілгендей қазақ қоғамын жаңғыртудың бірінші шарты өз мәдениетімізді, өз ұлттық кодымызды сақтау. Қазіргі Қазақстан этнографиялық ғылымына үлкен жауапкершілік арта отырып, жаңғыртуды табыспен іске асырудың алғы шарттары – тарихи тәжірибелеріміз бен үздік ұлттық дәстүрлерімізге сүйену.
Конференция жұмысының негізгі бағыттары
- Отандық этнология ғылымының тарихы.
- Қазіргі Қазақстан этнология ғылымының өзекті мәселелері.
- Этнология және оған байланысты ғылымдар: тарих, археология, көркемөнер, фольклортану және т.б.
- Музей және Қазақстандағы музей үрдісі.
- Қазақстандық өлкетану: «Туған жер» бағдарламасы аясындағы жаңа импульс.
Көрме аясында:
- Тарих ғылымдарының докторы, профессор Халел Арғынбаевтың Қазақстан Республикасы Мемлекеттік орталық музей қорында сақталған жеке заттары мен құжаттарының көрмесі өткізіледі.
- Республикамыздың этнологтарының күштерін біріктіру мақсатында Құрылтай мәжілісі мен Республикалық этнологтар мен антропологтар ассоциациясының тұсаукесерін өткізу жоспарлануда.
- «Қазақтың этнографиялық категориялар, ұғымдар мен атауларының дәстүрлі жүйесі. 5 томдық энциклопедия / Ғылыми редактор және жоба жетекшісі Нұрсан Әлімбай. – Алматы: «Әлем Даму Интеграция» ЖШС, 2017» ғылыми басылымның тұсаукесері өтеді.
- Осы конференция аясында этнография ғылымының соңғы 10 жылдықта жеткен жетістіктерін баяндайтын кітаптар көрмесі өтеді. Сонымен қатар жаңа шығарылымдардың тұсаукесері, плакаттар көрмесі, ғылыми әдебиеттерді тарату және айырбастау жөнінде киосктер жұмыс жасауы жоспарлануда.
Конференцияға этнологтар, тарихшылар, мәдениеттанушылар, фольклористер, өнертанушылар,археологтар,ұқсас пәндер өкілдері, ғылыми-зерттеу ұйымдары мен музей қызметкерлері және т.б. шақырылады.
Конференция – қазақ, орыс, ағылшын тілдерінде жүргізіледі.
Өткізілетін орын: Қазақстан Республикасы Мемлекеттік орталық музейінің кинозалы (Алматы қ., Самал-1 ықш. ауд., 44 үй).
Конференцияға қатысушыларды тіркеу: 09.00-10.00.
Конференцияның басталу уақыты: 13 сәуір сағ.10.00.
2018 жылдың 3-4 наурыз күндері Қазақстан Республикасы Мемлекеттік орталық музейі «Бақыт» сәндік-қолданбалы өнер орталығымен бірлесіп, 8 наурыз Халықаралық әйелдер күні мерекесіне орай Орталық Азия қолөнер шеберлерінің «ҚЫЗҒАЛДАҚТАР ГҮЛДЕГЕНДЕ» атты дәстүрлі көрме-жәрмеңкесін өткізеді.
Көктем - алғашқы гүлдер бәйшешек пен қызғалдақтардың уақыты, керемет көктемнің мерекесі - 8 наурыз. Осы мереке арқылы көктемнің жылуы мен жаз шырайының хабарының оянуын сезіне аламыз. Халықаралық әйелдер мерекесінің символы, көктемнің гүлі – бәйшешектер мен сыйлықтар беретін мезгіл.
Көркем өнер мен қолөнер туындыларының алуан түрлері көрме-жәрмеңкеге келушілерге мерекелік көңіл-күй сыйлайды. Мұнда тамаша әрі ғажайып сыйлықтар, авторлық үлгідегі әсем заттар мен қолөнер туындыларын сатып алуға болады.
Бұл ауқымды көрме-жәрмеңкеге Қазақстанның барлық аймағынан, сондай-ақ Қырғызстан, Тәжікстан, Түркіменстан, Өзбекстан, Ресей, Грузия және Монғолияның 100-ден астам халық шеберлерінің бірғана данадан тұратын бірегей туындылары – сыйлық және сувенирлік өнімдер, киізден және жібектен жасалған бұйымдар, кілемдер, зергерлік әшекейлер, қыш ыдыстар, бейнелеу өнері шығармалары көпшілік назарына ұсынылады.
Жәрмеңке – тек қолөнер бұйымдарын сатып алу орны ғана емес, сонымен қатар ол халықтың қолөнер кәсібі арқылы өз тарихын таныту шарасы. Онда шебер әсем бұйымдардың қалай жасалатындығы және қолөнер әдістерінің құпияларымен бөліседі. Көрме аясында суретші Өмірбекова Гүльнар батик бетін әрлеу бойынша шеберлік сабағын өткізеді.
Халық шеберлерінің біртума бұйымдары өнер сүюшіні бейтарап қалдырмайды. Бұл көрме-жәрмеңке - Алматы қаласының тұрғындары мен қонақтары үшін әрдайым нағыз мереке, жарқын мәдени оқиға.
Құрметті музей қонақтары! Баршаңызды ертедегідей шығыс базарының ғажайып думанын сезінуге шақырамыз!
Жәрмеңкенің жұмыс уақыты: 2018 жылдың 3-4 наурыз күндері сағат 9.00-18.00-ге дейін.
